Prurjet nga remitancat arritën vlerën 268 milionë euro, sipas BSH-së

Në tremujorin e dytë të këtij viti, emigrantët rezultojnë të kenë sjellë më shumë para në vend.

Referuar të dhënave të Bankës së Shqipërisë, prurjet valutore të emigrantëve, arritën në 268 milionë euro, duke pësuar një rritje me të njëjtën periudhë të një vitit më parë me 35.8 milionë euro.

Banka e Shqipërisë ka vënë në dukje se, janë rritur dërgesat jo vetëm në kanale formale sistem bankar dhe operatorë të transferimit të parave, por edhe në formën e prurjeve në cash.

Ndërkohë Italia dhe Greqia kryesojnë, si vendet prej nga vijnë prurjet më të larta për shkak të numrit të lartë të emigrantëve që jetojnë e punojnë në shtetet fqinje.

Më tej renditen vende si Anglia dhe  Gjermania.

Nivelet e larta të remitancave, shpenzimet e turistëve, investimet e huaja direkte – sipas Bankës së Shqipërisë – kanë qenë faktorët kryesore në zhvlerësimin e fortë të valutave në përgjithësi dhe euros në veçanti.

Vlera e remitancave që hynë në Shqipëri dy vite më parë arriti nivelin më të lartë të dekadës së fundit.

Kështu treguan shifrat e Eurostat të cilat treguan se vlera ishte më shumë se 1.2 miliardë euro, në rritje me 5.8% krahasuar me një vit më parë.

Vlera e raportuar nga Eurostat u referohet remitancave të matura si dërgesa apo transferta personale dhe të ardhurave të punonjësve nga puna jashtë vendit.

Për vitin 2022, mesatarja e vlerës së remitancave kundrejt Prodhimit të Brendshëm Bruto për vendet e Ballkanit Perëndimor ishte pranë nivelit të 10.5% (matur si mesatare e thjeshtë e raportit për 6 vendet e rajonit).

Të dhënat krahasuese të Eurostat tregojnë se vendi me varësinë më të madhe nga remitancat në rajon ngelet Kosova.

Për vitin 2022, remitancat përbënin 17.2% të Prodhimit të Brendshëm Bruto të vendit. Vijon Mali i Zi, me 13.3%, i ndjekur nga Bosnjë-Hercegovina, me 10.2%. Shqipëria renditet në vendin e katërt, me një vlerë remitancash sa 9.2% e PBB-së së vendit.

Sipas Eurostat, burimi kryesor i remitancave për Shqipërinë dhe vendet e tjera të rajonit janë vendet e Bashkimit Evropian.

Krahasuar me të gjitha vitet e tjera, për tremujorin e parë, viti 2023 përbën një rekord historik që prej vitit 2008, kur mbarojnë edhe të dhënat historike.

“Krahasuar me mesataren historike të dërgesave të emigrantëve në tre muajt e parë të vitit, viti 2023 regjistron një rritje prej 36.5 për qind”.

Sakaq, niveli rekord i remitancave është dhënë nga autoritetet shqiptare si një prej shkaktarëve të zhvlerësimit të euros, së bashku me investimet e huaja direkte dhe shpenzimet e turistëve.

Vitin pararendës, transfertat personale nga BE drejt vendeve jashtë BE-së arritën në më shumë se 43.5 miliardë euro, në rritje për të gjashtin vit radhazi vit radhazi, me 14% më shumë krahasuar me vitin 2021.

Vala e re e emigrimit e dekadës së fundit i ka dhënë shtysë një cikli të ri të rritjes të remitancave, që ngelen një burim i rëndësishëm për të ardhurat e familjeve shqiptare dhe një zë me peshë të konsiderueshme në bilancin e pagesave të vendit.

Të dhënat e Bankës së Shqipërisë tregojnë se rritja e remitancave ka vazhduar edhe gjatë pjesës së parë të vitit 2023. Për 9-mujorin, dërgesat e emigrantëve dhe të ardhurat nga puna arritën në 1.05 miliardë euro, në rritje me 16.3% krahasuar me të njëjtën periudhë të vitit të kaluar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.