Provimet e Maturës Shtetërore 2021 do të zhvillohen nga “data 3 qershor deri më datë 15 qershor”.
Ky është njoftimi i Ministrisë së Arsimit Sportit dhe Rinisë (MASR), e cila ka nisur përgatitjet që në fillim të vitit akademik 2020-2021.
Drejtoresha e Qendrës së Shërbimit Arsimor (QSHA), Rezana Vrapi, për Albanian Post (AP) tregon rreth përgatitjeve për Maturën Shtetërore.
“Agjencia e Sigurimit të Cilësisë së Arsimit Parauniversitar ka publikuar programet orientuese për të gjitha provimet e maturës shtetërore dhe për të gjitha profilet e shkollave; profesionale, me kohë të shkurtuara artistike etj.”, thotë fillimisht ajo.
Sipas saj, tashmë është përcaktuar regjistrimi në portalin e maturantëve për fazën A1 dhe A1Z.
Vrapi bën me dije se çdo maturant merr një ID të maturës shtetërore, mbi bazën e së cilës QSHA printon tezën.
Më pas, vazhdohet me finalizimin e rregullores së maturës shtetërore dhe udhëzimin e ministrit për datat. Vrapi thekson se “të gjitha këto janë të mbyllura dhe të finalizuar”.
Rregullorja e maturës shtetërore miratohet nga Ministria e Arsimit, ndërsa hartohet nga Komiteti i Maturës Shtetërore, i cili e ka nisur funksionimin që me fillimin e vitit akademik.
Cilësia e të nxënit pas mësimit online
“Pak e vështirë se ishim online për 2 vite. Sado nxënës i mirë të jesh, prapë është e vështirë përthithja e informacionit”, thotë për AP-në Ersada Metaliaj, maturante në Shkollën e Mesme të Përgjithshme “Hydajet Lezha” në Lezhë.
Ndërsa maturanti Aldi Marku shprehet për AP-në se nuk ndihet “aspak” i përgatitur, pasi e cilëson të mësuarin online si “sfidues”.
Tani që “provimet erdhën, nuk e di sesa gati jemi pas mësimit online?!”, thotë ndër të tjera maturanti.
Kjo, thotë ai, pasi “shpjegimi i ushtrimeve të matematikës, sipas platformës online, ka qenë i vështirë, për shkak të problemeve teknike. Shpeshherë mësuesja detyrohej ta përsëriste të njëjtin ushtrim, se disa nuk kishin lidhje të mirë me internetin”.
Megjithatë, drejtoresha e QSHA-së thotë se të gjithë këto problematika do të merren parasysh, pasi kjo metodë e të mësuarit “ka ndikuar në cilësinë e të nxënit nga ana e nxënësve, si dhe në cilësinë e mësimdhënies nga ana e mësuesve”.
“Ne jemi shumë të vëmendshëm në pjesën e marrjes parasysh të kushteve të pandemisë dhe mënyrës sesi është zhvilluar mësimi në shkolla”, thotë ajo.
Sipas udhëzimit, provimet e Maturës Shtetërore do të fillojnë në orën 10:00 të mëngjesit dhe do të zgjasin dy orë e 30 minuta. Testet e Maturës Shtetërore janë hartuar nga Qendra e Shërbimeve Arsimore, ku secili test do të vlerësohet me 60 pikë maksimale.
Provimi i gjuhës së huaj do të zhvillohet më 3 qershor 2021, ai i gjuhës shqipe dhe letërsisë më 7 qershor, i matematikës më 11 qershor. Kurse i fundit, ai i lëndës me zgjedhje, më 15 qershor. Secili provim ka një diferencë katërditore nga tjetri.
Hartimi i tezës
QSHA, si institucion, merret me saktësimin e strukturës së testit, përmbajtjes së saj dhe me mënyrën e zbatimit të programit orientues. Sipas drejtoreshës, do të tregohet vëmendje për llojet e pyetjeve dhe përmbajtjes së tyre.
“Do të mundohemi të kemi një test të ekuilibruar dhe të menaxhueshëm nga ana e vështirësisë. Të mos i kalojë ato nivele që mund të kenë qenë normale vitin e kaluar si vështirësi, por që këtë vit maturantët mund të mos kenë mundur t’i marrin të gjitha”, sqaron Vrapi për AP-në.
Artenisa Frroku, maturantja 18-vjeçare, shprehet se kanë zhvilluar orë shtesë dhe konsultime me mësuesit e lëndëve. Kjo, me qëllim përmbushjen e boshllëqeve që ka shkaktuar pandemia.
Masat e pandemisë në shkolla
Ndonëse shihet se Komiteti i Ekspertëve i ka lehtësuar masat në lidhje me pandeminë, sërish MASR ka vendosur të tregohet e rreptë me masat kundër pandemisë Covid-19.
Ajo shprehet se, pavarësisht se ditëve të fundit pandemia është lehtësuar, do të vazhdojmë sikur jemi në kushte që kemi qenë vitin e kaluar.
“Te rregullorja e MSH ka një seksion, që ka të bëjë me mjedisin në kushte pandemie. Do të respektohet distanca, kushtet e higjienizimit, hyrja nëpër shkolla. Të gjitha këto janë pjesë e rregullores së maturës shtetërore”, tha drejtoresha e QSHA-së, Vrapi.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
Begaj takon Tajanin, theksojnë partneritetin strategjik dhe vlerat ndërkombëtare që ndajnë
-
Raportimi i Kathimerini hedh hije dyshimi mbi vizitën e Ramës në Athinë
-
Turqia zyrtarizon ndalimin e tregtisë me Izraelin
-
Sondazhi i PIPOS zbulon se rreth 70 për qind e shqiptarëve do të votojnë për “Frontin Evropian” në zgjedhjet e 8 majit