Protesta e shqiptarëve të Luginës së Preshevës nis me himnin kombëtar

Ka nisur protesta gjithëpopullore e shqiptarëve të Luginës së Preshevës, kundër politikës diskriminuese të Serbisë. Para nisjes së protestës, në sfond është dëgjuar himni kombëtar, derisa protestuesve u është bashkuar edhe deputeti shqiptar në Kuvendin e Serbisë, Shaip Kamberi, krahas liderëve politikë, përfaqësuesve të shoqërisë civile dhe organizatave studentore.

Kjo protestë është duke u zhvilluar në Bujanoc. Ajo është thirrur nga Këshilli Kombëtar Shqiptar (KKSH) në Luginën e Preshevës pas situatës së krijuar rreth pasivizimit të adresave të shqiptarëve nga autoritetet serbe.

Ata janë duke mbajtur në duar flamuj kombëtarë shqiptarë, krahas atyre amerikanë, dhe pankarta: “Stop pasivizmit selektiv”, “Të shtypur po, të nënshtruar jo”, “Kthema adresën” dhe “Për identitet dhe dinjitet”.

E problemi i pasivizimit të adresave është përmendur edhe në Raportin e Progresit të Komisionit Evropian (KE) kushtuar Serbisë, kur është përmendur respektimi i të drejtave dhe lirive të pakicave kombëtare. Megjithatë, shteti serb ka vazhduar diskriminimin sistematik ndaj pakicës shqiptare në Preshevë, Medvegjë e Bujanoc, pavarërisht vërejtjeve ndërkombëtare.

Në bazë të regjistrimit të fundit të popullsisë, shqiptarët janë pakica e katërt më e madhe në Serbi, përkatësisht rreth 62 mijë shqiptarë jetojnë në Serbi. Por, në bazë të autoriteteve shqiptare në Luginë të Preshevës, deri më tash janë pasivizuar rreth gjashtëmijë adresa në Preshevë, Bujanoc dhe Medvegjë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.