Propaganda e Serbisë – ESI: S’ka asnjë provë për “spastrim etnik” apo “terror” ndaj serbëve në Kosovë

Në bazë të një analize të Iniciativës Evropiane për Stabilitet (ESI) pas manipulimit të statistikave nga zyrtarë serbë mbi largimin e pretenduar të serbëve nga Kosova, përfshirë deklaratat e presidentit serb, Aleksandër Vuçiç, gjatë seancës së Këshillit të Sigurimit të Kombeve të Bashkuara (OKB), del se nuk ka pasur asnjë lëvizje negative të popullatës serbe.

“Nuk duhet të jetë e vështirë për organizatat ndërkombëtare të hedhin poshtë pretendimet e rreme dhe manipulimet e rrezikshme për pogrome […] Nuk është ofruar asnjë provë për pogromet e supozuara, dhunën sistematike apo ‘spastrimin etnik’ të supozuar në vitet e fundit”, konstatoi ESI në raportin “Pogromet e sajuara – statistikat, gënjeshtrat dhe konfuzioni në Kosovë”.

Nën hijen e retorikës së papërgjegjshme, presidenti serb pretendoi se vetëm në dymbëdhjetë muajt e fundit, nga territori kosovar janë larguar “14 për qind” e serbëve që popullojnë kryesisht pjesën veriore të Kosovës, ndërsa shpërtheu në manipulime duke përmendur “pogrome” e “dëbim të serbëve” nga Kosova pas vendimit për ndalimin e përdorimit të dinarit serb në vend.

ESI theksoi se asnjë nga vëzhguesit ndërkombëtarë në Kosovë – nga KFOR-i e UNMIK-u, deri te EULEX-i dhe OSBE-ja – nuk kanë parë apo përshkruar “spastrim etnik” apo “terror” ndaj popullatës serbe në Kosovë gjatë viteve të fundit. Megjithatë, instituti evropian paralajmëron se nëse manipulime të tilla nuk denoncohen, situata lehtë mund të përshkallëzohet tutje.

Analiza e ESI-së i referohet edhe raportit të Grupit Ndërkombëtar të Krizave (ICG), ku përmendet një numër prej “10 për qind” të të larguarve nga Kosova vitet e fundit. Pretendimi i ICG-së është i bazuar vetëm në disa njohuri konvencionale dhe nuk paraqet realitetin në terren, sipas raportit të ESI-së. Madje, në raport përmendet edhe propaganda e mediave serbe.

“Ashtu siç edhe e kemi parë, këto shifra nuk janë reale […] Është koha që sa herë të paraqiten statistika të llojit të tillë të ketë reagim. Ajo që është e sigurt është se retorika rreth pogromeve të sajuara dhe dhunës së nevojshme ka shumë më tepër gjasa të përshpejtohet sesa ta ndryshojë këtë prirje”, nënvizohet ndër të tjera në analizën 18 faqeshe të ESI-së të publikuar rishtas.

Duke qenë se Serbia aktualisht ndodhet në mes të një kryqëzimi kritik ndërmjet demokracisë liberale dhe autoritarizmit populist, shembujt e propagandës dhe përpjekjet blatante për ta ndryshuar historinë nuk janë të vështirë për t’u gjetur, pa përjashtuar propagandën dhe dezinformatat mbi zhvillimet politike në dialogun ndërmjet Kosovës dhe Serbisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.