“Promovohet pavarësia e Kosovës”, Jovanoviç për festivalin “Mirdita, dobar dan”

Millosh Jovanoviç, lideri i partisë serbe të ekstremit të djathtë – Partia e Re Demokratike e Serbisë (DSS), ka thënë se përmes festivalit “Mirdita, dobar dan”, është tentuar të promovohet pavarësia e Kosovës.

“Pavarësia e Kosovës po promovohet nën petkun dhe pretekstin e kulturës dhe në edicionet e kaluara të festivalit kishte gjithçka, përfshirë edhe stemën e UÇK-së, gjë që është absolutisht e papranueshme në Beograd dhe ne jemi kundër saj”, tha Jovanoviç në konferencë për media, shkruajnë mediat serbe.

“Nuk kam asgjë kundër shkëmbimit kulturor, shkëmbimit të ideve, por Kosova dhe është pjesë e pandashme dhe e patjetërsueshme e Serbisë”, ka pretenduar ai.

Ndërkaq ministri i Kulturës në Serbi, Nikolla Selakoviç, ka thënë se përpjekja për organizimin e festivalit “është më shumë se një provokim” .

Dy ditë më parë, kryetari në detyrë i Beogradit, Aleksandër Shapiç, ka njoftuar se Serbia nuk ka dhënë leje që të mbahet festivali “Mirdita, dobar dan”.

Ai potencoi se është “shprehimisht” kundër mbajtjes së festivalit “Mirdita, dobar dan”, për të cilin propagandoi se prej vitesh “falsifikon dhe ndryshon drejtpërdrejt historinë përmes promovimit e trashëgimisë kulturore të Kosovës, duke përjashtuar faktin që ajo është serbe”.

“Ne si Administratë e Qytetit nuk kemi mundësi ligjore t’i ndalojmë, por në asnjë mënyrë nuk do të lejojmë që asgjë që ka të bëjë me qytetin e Beogradit të jetë në shërbim të tyre”, pretendoi ai.

Ndryshe, Festivali “Mirëdita, dobar dan” është një ngjarje e përvitshme që zhvillohet çdo vit që nga viti 2014.

“Mirëdita, dobar dan!” është festivali, siç thuhet në faqen zyrtare të tij, që bashkon artin, kulturën, avokimin dhe debatin publik në një platformë, gjë që e bën atë unik në llojin e tij.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.