Prokurori në Speciale analizon rolin e zëvendëskomandantit të UÇK-së duke u bazuar në prova të Serbisë

Në Dhomat e Specializuara të Kosovës (DhSK), të Gjykatës Speciale të hënën gjatë dëshmisë ish ushtari i Ushtrisë Çlirimtare të Kosovës, Kurtesh Fondaj, është pyetur nga prokurori Matthew Halling, për ushtrimin e funksionimit të zëvendëskomandantit.

Dëshmitari, ka thënë se nuk i kujtohet saktë nëse funksionet të cilat i përmendi prokurori Halling, “janë të gjitha të sakta”.

Më pas prokurori bëri të ditur se provat të cilat i kanë siguruar janë marrë nga Ministria e Punëve të Brendshme të Serbisë.

Gjykatësi e ka pranuar dokumentin duke thënë se “do ta rishkojnë edhe njëherë kur të vijë puna për t’i dhënë peshën”.

Pjesë nga intervistimi i dëshmitarit Kurtesh Fondaj:

Prokurori: A është përshkruar saktë këtu funksionimi i ndihmës së komandantit për zbulim dhe kundërzbulim?

Kurtesh Fondaj: Është i përshkruar, por tash a është saktë apo a ka mbetë diçka pa u thënë unë nuk e di. Elementet e vogla nuk i di sepse e përmenda me të vërtetë ka kaluar shumë kohë dhe unë nuk mund të lëshohem në çështje të ekspertizës sa i përket kësaj problematike.

Prokurori: Të nderuar gjykatës ne themi që përshkrimi përputhet në parim me ato që kujton dëshmitari, ky është një dokument që është sekuestruar nga autoritetet serbe, konkretisht është marrë nga MUP-i serb në Prizren në vitin 1998.

Dokumenti kundërshtohet nga mbrojtje duke thënë se “duke marrë parasysh faktin se nga është marrë ky dokument dhe argumentin se kush është autori, nuk ka themelësi për vendimin e këtij dokumenti dhe gjithashtu e njëjta gjë ka ndodhur edhe me dëshmitarin e kaluar kur është treguar ky dokument, bëhet fjalë për dëshmitarin ‘04765”, deklaroi mbrojtja.

Në DhSK, ka nisur dëshminë ish ushtari i Ushtrisë Çlirimtare të Kosovës, Kurtesh Fondaj, që është dëshmitari i 73-të në Speciale.

Prokuroria ka vlerësuar se Fondaj, ka njohuri për mënyrën e funksionimit të shtabit të UÇK-së.

“Dëshmitari me numër 4744 është ish-ushtar i UÇK-së. Do të flasë për mënyrën se si ka funksionuar Shtabi i Përgjithshëm i UÇK-së”, ka thënë prokurori, Matthew Halling në seancën e së hënës.

Ai është pyetur për disa dokumente, teksa dëshmia e tij pritet të zgjasë dy ditë.

Ish ushtari i UÇK-së pyetet për Skender Hoxhën e Blerim Kuçin në Speciale  

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.