Aplikacione

Problem Instagram-i, fshihen ‘like’-et e përdoruesve


Media sociale Instagram ka pasur një defekt. Për një kohë të shkurtër janë fshirë pëlqimet për disa nga përdoruesit e saj, pasi zgjeroi aksidentalisht një test të funksionit.

“Ne kemi provuar një veçori të re për të fshehur pëlqimet nga postimet”, ka deklaruar zëdhënësi i Facebook-ut, zotëruesi i platformës, për agjencinë e lajmeve, CNN.

Zëdhënësi sqaroi se “ne shtuam padashur më shumë njerëz gjatë provës, e cila ishte një e metë, prandaj dhe po e rregullojmë këtë çështje dhe po rikthejmë numrin e atyre personave sa më shpejt të jetë e mundur”.

Sipas CNN, fshirja aksidentale e pëlqimeve në postimet e disa përdoruesve bëri që ata të raportonin se kishin vërejtur një ndryshim në profilet e tyre, ku numri i pëlqimeve ishte zëvendësuar me frazën “dhe të tjerët”.

Lidhur me provën, Instagram-i ka zhvilluar teste të kufizuara për vite me radhë. Ato u pasuan me një deklaratë të kompanisë në vitin 2019 se do të hiqte numrin e pëlqimeve nga postimet për një numër të vogël llogarish në Kanada.

Mirëpo, platforma nuk ka dhënë ende një konfirmim se cili do të jetë afati kohor kur pëlqimet e fshehura të hapen gjerësisht.

Për sa i përket funksionimit të veçorisë, ndjekësit nuk do të jenë në gjendje të shohin numrin e përgjithshëm të pëlqimeve, që janë grumbulluar për një postim të caktuar.

Ndërkohë, poseduesi i llogarisë mund të vazhdojë të shohë pëlqimet e marra nëpërmjet një klikimi që të çon te lista e plotë e llogarive që e kanë pëlqyer postimin, gjithsesi nuk është në gjendje të shohë një numër të tyre.

Sipas CNN, lëvizja e Instagram-it erdhi si një nevojë për të ndihmuar në uljen e presionit të grumbullimit të pëlqimeve në platformë. Kjo, pasi numri i tyre shihet si një masë e popullaritetit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore