Pritet takimi i Kurtit me bordin e Trepçës, minatorët pa paga e në grevë

Kryeministri i Kosovës, Albin Kurti së bashku me ministrin e Financave, Punës dhe Transfereve Hekuran Murati, gjatë javës së ardhshme pritet të takohen me bordin mbikëqyrës të ndërmarrjes “Trepça”, pas 24 ditëve në grevë për të diskutuar rreth ekzekutimit të pagave për minatorët.

Lajmin e ka mësuar Albanian Post nga burime të saj të cilat thonë se takimi pritet të mbahet në fillim të javës.

Ndonëse në takim kishin kërkuar që të jenë të pranishëm edhe sindikata e minatorëve, të njëjtëve s’u është kthyer përgjigje në kërkesën e tyre.

Minatorët e Trepçës kanë hyrë në ditën e 24-të grevës për shkak të mosekzekutimit të pagave dhe shujtave ushqimore.

Përfaqësuesit e minatorëve të Trepçës kanë potencuar se ka pasur shitje në “Trepçë” gjatë këtij viti, prandaj e kanë parë të paarsyeshëm mosekzekutimin e pagave për dy muaj radhazi.

Qeveria e Kosovës ka deklaruar të enjten në një deklaratë për shtyp se përkrahja financiare për ndërmarrjen “Trepça” varet nga zotimi se do të ulen shpenzimet dhe do rifillojë rritja e prodhimit.

Teksa, më 2 gusht, Faton Ahmeti, është emëruar ushtrues detyre në pozitën e kryeshefit në bordin mbikëqyrës të ndërmarrjes “Trepça”.

Ahmeti, deri tani kishte mbajtur pozitën e zëvendëskryeshefit, teksa emërimi i tij ka ardhur pasi që vendimi që ishte marrë për emërimin e Bashkim Kurtit në pozitën e kryeshefit u anulua më 23 korrik nga Gjykata Themelore në Mitrovicë.

Marrja e këtij vendimi kishte ardhur pas ankesës që kishte bërë kundërkandidatit Burim Asllani, i cili pretendoi se ishin bërë parregullsi në procesin e përzgjedhjes nga Bordi.

Kryeshefi i Trepçës dhe Qeveria Kurti të painteresuar për hallet e mbi 700 minatorëve

Mos përmirësimi i kushteve të punëtorëve të Trepçës, ka dërguar në greva të njëpasnjëshme.

Kompleksi metalurgjik Trepça, deri në vitet 90 atëherë kur ishte përkeqësuar situata politike, ishte llogaritur si një prej ndërmarrjeve më të mëdha, jo vetëm në Kosovë, por edhe në territorin e Jugosllavisë së atëhershme.

Rënia e prodhimit ka nisur në vitet 90 kur regjimi i atëhershëm i Serbisë ka vendosur masa të dhunshme në Kosovë, kështu duke mbyllur gati të gjitha ndërmarrjet dhe institucionet në vend.

Ndërmarrja nuk ka arritur asnjëherë të vihet në funksion të zhvillimit ekonomik të Kosovës, por pritet të kalojë nën Fondin Sovran të Qeverisë së Kosovës.

Fond ky i cili do t’i marrë nën pronësi të gjitha asetet strategjike të Kosovës, për të investuar më pas në rritjen e vlerës së tyre, ndërsa miratimi i tij është paraparë që të bëhet brenda vitit 2023.

Kryeshefi i Trepçës dhe Qeveria Kurti të painteresuar për hallet e mbi 700 minatorëve

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.