Prigozhin nuk e pranoi ofertën që Putin i bëri për Wagner

Kreu i grupit mercenar Wagner, Yevgeniy Prigozhin, ka refuzuar një ofertë për luftëtarët e tij për të shërbyer si njësi në Ushtrinë ruse, tha presidenti Vladimir Putin lidhur me ngjarjet e fundit që kanë përfshirë mercenarët.

Ai i tha gazetës Kommersant se shumë komandantë grupesh kishin mbështetur planin që do të udhëhiqej nga një figurë e lartë Wagner gjatë bisedimeve të fundit në Moskë.

Më tej, shtoi se përgjigja e Prigozhin ishte që “djemtë nuk pajtohen me këtë vendim”.

Bisedimet u mbajtën vetëm disa ditë pas rebelimit të ndërprerë të Wagnerit më 23-24 qershor, i cili sfidoi autoritetin e Putinit.

Sipas marrëveshjes që i dha fund rebelimit jetëshkurtër, mercenarëve iu tha se mund të bashkoheshin me Ushtrinë e rregullt ruse ose të shkonin në Bjellorusi, një aleat i ngushtë i Rusisë.

Wagner ka luftuar disa nga betejat më të përgjakshme që kur Rusia nisi pushtimin e saj në shkallë të plotë të Ukrainës në shkurt 2022.

Megjithatë, Ushtria amerikane tani vlerëson se grupi nuk është më “pjesëmarrës në ndonjë kapacitet të rëndësishëm në mbështetje të operacioneve luftarake në Ukrainë”.

Komentet u bënë të enjten nga zëdhënësi i Pentagonit, Pat Ryder, i cili bëri me dije gjithashtu se “shumica” e luftëtarëve të Wagner besohet se janë ende në zonat e Ukrainës të pushtuar nga Rusia.

Në një zhvillim të veçantë, Ministria e Mbrojtjes e Bjellorusisë tha të premten se luftëtarët Wagner tani po vepronin si instruktorë ushtarakë për forcat e mbrojtjes territoriale të vendit.

Ministria tha se luftëtarët po stërvitnin forcat bjelloruse “në një numër disiplinash ushtarake” pranë qytetit të Osipovich, rreth 85 kilometra në jug-lindje të kryeqytetit Minsk.

Luftëtarët e Wagner po trajnojnë ushtarët në Bjellorusi, thotë Ministria e Mbrojtjes

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.