Pretendimi i Vuçiç-it: “Kurti është i vetmi që do luftë, ka dashur gjithë jetën të veshë uniformë”
![](https://albanianpost.com/wp-content/uploads/2023/12/vuci.jpg)
Presidenti i Serbisë, Aleksandër Vuçiç, ka pretenduar se Kryeministri i Kosovës, Albin Kurti, është i vetmi “që do luftë”, sepse, sipas tij, “gjatë gjithë jetës së tij ka pasur dëshirë të veshë uniformë” dhe ta “luajë Zelenskyy-n e vogël në Ballkan”.
Këto komente, Vuçiç i ka bërë në një konferencë për media, pasi që është pyetur nga gazetarët rreth deklaratave të Kurtit se “Serbia po armatoset dhe po përgatitet ta sulmojë Kosovën”.
Por, sipas pretendimeve të Vuçiç-it, “ëndrrat e Kurtit janë lufta”, ndërsa të tijat “janë një Serbi e suksesshme, e zhvilluar ekonomikisht, deri tani më e zhvilluara në rajon”.
“A po armatosemi – po, pak më shumë se sa do të donte ai [Kurti], shumë më pak se sa do të doja unë. Ashtu siç po armatosen ata dhe po armatosen nga turqit, përmes gjermanëve te amerikanët…”, tha Vuçiç, transmetojnë mediat serbe.
“Ai [Kurti] do luftë, sepse gjithë jetën dëshiron të veshë uniformën dhe të veprojë në Ballkan si Zelenskyy i vogël, por dëshira e tij nuk do të realizohet sepse nuk ka të bëjë me një territor sovran dhe një territor të pavarur, në fund të fundit”, propagandoi ai.
Ai theksoi se Serbia do të vazhdojë të investojë në industrinë e saj “për të blerë gjithçka që është e nevojshme për të qenë frenues për Kurtin dhe të tjerët”.
“Ne do të vazhdojmë me të dhe po bëjmë mirë. Ne bëjmë më të mirën dhe blejmë më të mirën. Askush nuk do të mund të ndalojë kurrë zhvillimin e industrisë dhe ushtrisë sonë të përkushtuar. Ne po e bëjmë këtë vetëm për të penguar djemtë si Kurti dhe të tjerët”, shtoi.
Ndërkaq, kreu serb pohoi se në muajin e ardhshëm në Serbi do të vijnë liderët e shumë vendeve evropiane dhe afrikane, dhe se ai personalisht do t’i vizitojë disa vende, dhe gjatë bisedave “do të tregoj qëndrimin e Serbisë për ruajtjen e paqes dhe stabilitetit”.
“Dy javët e ardhshme janë shumë të rëndësishme për ne. Do të kemi shumë vizita, nisje. Do të marrim pjesë edhe në Samitin e Komunitetit Politik Evropian në Londër. Pres në Beograd përfaqësues të vendeve më të mëdha evropiane dhe vendeve më të mëdha afrikane. E gjithë kjo do të ndodhë në muajin e ardhshëm. Ne kemi një verë të ngarkuar përpara”, potencoi ai.
Ndryshe, kryeministri Kurti, pasi që Kina dhe Rusia vazhdojnë armatosjen e Serbisë, ka ngritur shqetësimin se ajo mund ta sulmojë Kosovën, siç ndodhi më 24 shtator të vitit të kaluar në Banjë të Zveçanit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com