Ministri i Mbrojtjes së Serbisë, njëherit Kryetari i Partisë Progresive Serbe (SNS), Millosh Vuçeviç, e ka cilësuar situatën e sigurisë në Serbi “të rëndë”, duke pretenduar se kërcënimi më i madh për sigurinë është “situata në Kosovë”, duke shtuar se ky rrezik “nuk po zvogëlohet”.
“E vetmja gjë pozitive”, në vlerësimin e tij, “është fakti se disa nga serbët e arrestuar nga Kosova janë liruar”.
“Ajo që posaçërisht na frikëson është vazhdimi i armatimit të Forcës të Sigurisë së Kosovës dhe një plan i qartë që nuk e fshehin se Forcat e Sigurisë së Kosovës do të bëhen Forca të Armatosura të Kosovës deri në vitin 2026, gjë që është në kundërshtim edhe me atë që ata e përcaktojnë si Kushtetutën e tyre”, ka pretenduar Vuçeviç, transmeton agjencia serbe e lajmeve “Tanjug”.
Në Serbi, aktualisht është duke u zhvilluar fushata zgjedhore për zgjedhjet parlamentare që priten të mbahen më 17 dhjetor.
Një pjesë e partive atje, posaçërisht SNS-ja e presidentit serb Aleksandër Vuçiç, po përdorin Kosovën, në mënyrë që të përfitojnë nga votat e nacionalistëve serbë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
