Presioni ndaj Kosovës dhe Serbisë do të vazhdojë derisa të nisë zbatimi i marrëveshjeve, thotë Borrell

Përfaqësuesi i Lartë i Bashkimit Evropian (BE) për Politikë të Jashtme dhe Siguri, Josep Borrell, në një-vjetorin e “marrëveshjes historike” që u arrit më 18 mars 2023 në Ohër të Maqedonisë së Veriut ndërmjet Kosovës dhe Serbisë pas një cikli të gjatë të negociatave, tha se do të vazhdojë presioni ndërkombëtar ndaj të dyja palëve derisa të nisë zbatimi i marrëveshjeve.

Duke shprehur keqardhje që përkundër përpjekjeve të BE-së, deri tani nuk ka pasur progres konkret në zbatimin e obligimeve që palët kanë marrë përsipër, kryediplomati evropian deklaroi para gazetarëve në Bruksel të Belgjikës se shpreson që palët do të vazhdojnë rrugën e normalizimit të marrëdhënieve ashtu siç përcaktohet në marrëveshjen e arritur vitin e kaluar.

“Sot është përvjetori i Marrëveshjes së Ohrit – koha fluturon dhe tashmë është bërë një vit që kur Kosova dhe Serbia arritën marrëveshje për të ecur drejt normalizimit. Përkundër mbështetjes së gjerë të BE-së, palët kanë arritur pak progres. Shpreh keqardhje që kjo marrëveshje e vështirë për t’u arritur nuk është zbatuar”, theksoi shefi i diplomacisë evropiane të hënën.

Borrelli përmendi edhe ciklin e ri të negociatave që pritet të zhvilliohet të martën (19 mars) midis kryenegocitarovëve të Kosovës dhe Serbisë – Besnik Bislimi dhe Petar Petkoviç – nën patronazhin e Emisarit Special të BE-së për dialogun Prishtinë-Beograd, Mirosllav Lajçak, ku pritet të diskutohet për gjetjen e një zgjidhjeje për dinarin dhe çështje të tjera urgjente në proces.

“Së shpejti do të kemi takimin tjetër të kryenegociatorëve këtu në Bruksel. Do të vazhdojmë të bëjmë presion ndaj të dyja palëve në mënyrë që të lëvizin përpara drejt zbatimit të marrëveshjes. Por, një vit pas, zbatimi nuk ka qenë ashtu sa unë kisha pritur të jetë”, shtoi shefi i diplomacisë së BE-së në prag të nisjes së takimit ministror të Këshillit të Punëve të Jashtme të BE-së.

Kryeministri i Kosovës Albin Kurti dhe Presidenti i Serbisë Aleksandar Vuçiç e pranuan marrëveshjen më 27 shkurt në Bruksel. Pastaj u arrit një dakordim që do ta përcaktonte trajektoren e procesit të normalizimit në qytetin piktoresk të Ohrit. Megjithatë, një vit pas, tensionet politike dhe pengesat praktike ende mbeten emërues të përbashkët të zhvillimeve në dialog.

Borrell e Blinken kërkojnë zbatim të shpejtë të marrëveshjeve Kosovë-Serbi në dritën e paralajmërimeve për tensione të reja

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.