“Presidenti s’ka të drejtë arbitrarisht dhe jashtë kompetencave t’i shtyjë zgjedhjet” – Vetëvendosje kur Thaçi ishte president

“Askush nuk ka të drejtë e autorizime, e aq më pak Presidenti që arbitrarisht dhe jashtë kompetencave të tij të pamundësojë ushtrimin dhe përmbushjen e këtyre të drejtave përmes shtyrjes pa afat të mbajtjes së zgjedhjeve për kryetar të komunës”.

Kështu e kishin dhënë arsyetimin Grupi Parlamentar i Lëvizjes Vetëvendosje me 22 qershor të vitit të kaluar, kur e dorëzuan në Gjykatën Kushtetuese vendimin e Hashim Thaçit për të shtyrë zgjedhjet në dy komuna të Kosovës, për shkak të numrit të madh të rasteve infektive me COVID-19.

“Rrezikimin e shëndetit publik”, atëherë nga Vetëvendosje e kishin quajtur të pabazë.

“Qytetarët e Komunës së Besianës vazhdojnë të privohen nga e drejta e tyre e përcaktuar me Kushtetutë për të zgjedhur përfaqësuesin e tyre si Kryetar të Komunës”, thuhej në njoftimin e LVV-së në Facebook, i cili përcillej me një fotot të tash-ministrit Hajrullah Çeku me dosjen e përgatitur për ta dorëzuar në Kushtetuese.

“Sot, Grupi Parlamentar i Lëvizjes Vetëvendosje dorëzoi në Gjykatën Kushtetuese kërkesën për vlerësimin e kushtetutshmërisë së vendimeve antikushtetuese të Presidentit të Republikës së Kosovës për shtyrjen e zgjedhjeve të jashtëzakonshme për Kryetar të Komunës së Besianës dhe të Komunës së Mitrovicës së Veriut”.

Nga VV kishin cituar Kushtetutën dhe konventat ndërkombëtare për t’i dhënë vetës të drejtë.

“Komuna është njësi themelore e vetëqeverisjes lokale në Republikën e Kosovës, e cila gëzon shkallë të lartë të vetëqeverisjes lokale dhe inkurajon e siguron pjesëmarrje aktive të të gjithë qytetarëve në procesin e vendimmarrjes së organeve komunale”.

“Gjithkush ka të drejtë të marrë pjesë në qeverisjen e vendit të vet, drejtpërdrejt ose me anë të përfaqësuesve të zgjedhur lirisht. Këto të drejta kushtetuese të qytetarëve mundësohen përmes shpalljes dhe organizimit të zgjedhjeve të lira dhe të drejtpërdrejta”.

Ish-presidenti, Hashim Thaçi, ishte akuzuar se me vendimin e tij për të shtyrë zgjedhjet kishte “privuar qytetarët nga e drejta për të zgjedhur dhe për t’u zgjedhur, siç përcaktohet me nenin 45 të Kushtetutës”.

“Vendimi i Presidentit për shtyrjen e mbajtjes së zgjedhjeve në Besianë dhe Mitrovicë është në kundërshtim me Kushtetutën e Republikës, si dhe në kundërshtim me konventat ndërkombëtare të integruara në Kushtetutë si dhe me praktikat e mira dhe Kartën Evropiane të Vetëqeverisjes Lokale”.

Albanian Post ka kontaktuar me ministrin Hajrullah Çeku. Ai s’ka dashur të flas për këtë temë.

“Ja, ja, ja nuk flas”, ka thënë ai, derisa ka treguar se është jashtë vendit dhe nuk ka shumë kohë.

Po tani?

Tani IKSHPK ka rekomanduar presidenten që – jo në dy komuna – por në gjithë vendin të shtyhen zgjedhjet.

Presidentja rekomandimin e IKSHPK-së do ta diskutojë të hënën në një mbledhje me partitë politike.

Deri tani partitë opozitare kanë refuzuar këtë ide dhe e kanë quajtur “të rrezikshme”.

Derisa nga Vetëvendosje ende nuk janë deklaruar nëse janë për shtyrje të zgjedhjeve, por ishte kryeparlamentari i Kuvendit, Glauk Konjufca, që i pari e hodhi si ide shtyrjen.

Konjufca tha se për shkak të pandemisë, mbase është më mirë të shytën për një afat të pacaktuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.