Presidenti kroat: Vuçiç, ky nxitës i luftërave

Presidenti i Kroacisë, Zoran Millanoviç, gjatë qëndrimit të tij në New York në një ligjëratë në Columbia University, ka thënë se pengesa më e madhe e Serbisë për anëtarësimin e saj në BE është Aleksandër Vuçiç, i cili ka qenë një prej nxitësve më të mëdhenjë të luftërave në ish-Jugosllavinë e viteve 90-ta.

“Vuçiç është një prej nxitësve më të mëdhenjë të luftërave në vitet e 90-ta, dhe kjo është gjëja më e rëndë”, ka ligjëruar Millanoviç.

Ai gjithashtu tha se Serbia edhe ashtu nuk është se ka qëllim të madh të anëtarësohet në BE, sikurse bën Shqipëria dhe Maqedonia e Veriut “të cilët punojnë jashtëzakonisht shumë për këtë”.

Ndërsa i menjëhershëm ka qenë reagimi i Ministrit të Policisë së Serbisë, i cili qe kohë bën apologjinë morale e politike të presidentit të tij, Aleksandër Vuçiç.

Vulin eskaloi në etiketimin e presidentit kroat si “Ustashi”, por edhe të gjithë politikanët kroatë të tjerë, se përbrendësisht afirmohen me organizatën famëkeqe fashiste-nacionaliste të Luftës së Dytë Botërore.

“Në Kroaci politikanët janë të ndarë në Ustasha të hapur dhe të mbyllur. Kur nuk e dinin se po filmohen, ai me krenari i pranoi rrënjët e tij prej Ustashi. Millanoviç dëshmoi se i përket ndjekësve të fshehur të lëvizjes së Ustashëve. Por se është një prej politikanëve më budallenjë, ai e dëshmoi kur u mundua t’i mbyllë kufijtë me Serbinë në vitin 2015, dhe këtë e konfirmon çdo ditë me sulmet ndaj Serbisë dhe Vuçiçit”, deklaroi ashpër Vulin.

Ditë më parë, Presidentët e Kroacisë dhe të Malit të Zi, gishtat i kanë drejtuar kah Presidenti i Serbisë, Aleksandër Vuçiç, se po nxit nacionalizëm destruktiv në rajon.

Në vizitën e tij në Kroaci, presidenti malazias, Millo Gjukanoviç, ka deklaruar se Vuçiç po e ringjallë nacionalizmin serb të atij lloji që e ka futur rajonin në luftë.

“Përsëri po shpërndahet iluzioni se demokracia multi-etnike është e pamundur në Ballkanin Perëndimor, se ka ardhur koha të krijojmë shtetete të zgjeruara dhe homogjene nacionale dhe religjioze”, u shpreh Gjukanoviç.

Ai tha se identiteti qytetar dhe sekular i malaziasëve “po sulmohet nga serviliteti aktual i qeverisë së Malit të Zi e deri te qendrat e nacionalizmit serb në Beograd”.

Pas takimit me Gjukanoviçit, Presidenti i Kroacisë, Zoran Millanoviç, kishte kritikuar ashpër formën e stërmbushjes së qyteteve me flamuj serb, thirrje kjo nga Vuçiç për të festuar unitetin serb më 15 shtator.

“Një nga rrënjët e keqkuptimeve kroate-serbe ka qenë shfaqja e flamujve serbë nëpër institucione. Këtu kishte filluar problemi, nga sjelljet provokative serbe në zona ku ata kanë qenë minoritet”, tha Millanoviç, ndërsa shtoi se kjo kjo shkon përtej të qënit minoritancë, por naconalizëm.

E sa për të drejtat e minoriteteve, Millanoviç u shpreh se “e gjithë karriera dhe jeta ime politike përbëhet nga beteja për tu mbrojtur të drejtat e atyre që janë më të dobët”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.