Presidenti austriak në Shkup: Të miratohen ndryshimet kushtetuese pa humbur kohë

Presidenti i Austrisë, Aleksandër Van der Bellen, ka kërkuar nga autoritetet maqedonase që sa më parë të miratojnë ndryshimet kushtetuese, të domosdoshme në procesin e integrimit evropian të Maqedonisë së Veriut.

Van der Bellen, pas takimit me presidentin maqedonas, Stevo Pendarovaki, gjatë konferencës për media theksoi se Shkupi duhet të vazhdojë të jetë shembull në rajon sa i përket respektimit të të drejtave të pakicave kombëtare dhe bashkëpunimit rajonal.

“Kjo nuk ka të bëjë vetëm me shqiptarët, por me të gjitha pakicat tjera. Që procesi integrimit evropian të ecë përpara duhet të bëhet edhe një hapë tjetër, të miratohen ndryshimet kushtetuese, ashtu siç jeni marrë vesh”, tha ai, transmeton Radio Evropia e Lirë.

Ndryshimet duhet të bëhen për përfshirjen e pakicës bullgare në preambulën e Kushtetutës së Maqedonisë së Veriut, si popull shtetformues, ashtu siç parashihet me marrëveshjen me Bullgarinë, bazuar në “propozimin francez” për zgjidhjen e mosmarrëveshjeve për identitetin maqedonas, gjuhën dhe dallimet historike.

“Unë i kuptoj frustrimet sa i përket zgjatjes së procesit të integrimit evropian, por pikërisht për shkak të kësaj është me rëndësi që të shfrytëzohet momenti aktual dhe mos të humbet edhe më shumë kohë. Ju keni mbështetjen tonë të plotë”, tha presidenti austriak.

Ndërsa presidenti austriak shprehu mirënjohje për Maqedonisë së Veriut, e cila i mbështeti sanksionet e bllokut kundër Rusisë dhe ofroi ndihmë për Ukrainën, por nuk e harroi edhe organizimin e takimit të nivelit të lartë në kuadër të dialogut Kosovë-Serbi.

“Maqedonia e Veriut është shembull shumë i mirë edhe për bashkëpunimin rajonal, përfshirë edhe procesin për normalizimin e raporteve mes Kosovës dhe Serbisë. Para dhjetë ditëve këtu ishte nikoqir i bisedimeve mes dy vendeve. Ajo po jep rol të rëndësishëm edhe me kryesimin e OSBE-së”, tha ai.

Van der Bellen i bëri thirrje opozitës maqedonase, që drejtohet nga VMRO–DPMNE-ja, që t’i mbështes ndryshimet, për të cilat nevojiten dy të tretat, apo 80 nga 120 deputetët e Kuvendit të Maqedonisë së Veriut.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.