Premtimet për investime në “Kullën e Jasharëve” mbetën vetëm premtime

Qeveria e Kosovës, tash e sa vite ndan buxhet për investime tek kompleksi memorial “Kulla e Jasharëve”, por megjithatë ky objekt vazhdon të jetë në rrezik nga shembja.

Investimet edhe pse u thanë dhe u premtuan nuk filluan asnjëherë.

Më 21 dhjetor, kryeministri i Kosovës, Albin Kurti, deklaroi se nga java e ardhshme do të nisin investimet tek ky kompleks memorial.

Por, këto premtime nuk po i konsideron si të vërteta, ish Drejtori i përgjithshëm i Agjencisë për Menaxhimin e Komplekseve Memoriale të Kosovës, Idriz Blakaj.

Ai në një prononcim për Albanian Post, premtimet e tilla i ka quajtur “tallëse”, duke përfshirë edhe qeveritë e kaluara.

“Të gjitha qeveritë janë tallë me Kullat e Jasharëve. Të njëjtën po e bënë Albin Kurti”.

Madje, Blakaj ka edhe një qëndrim për këtë çështje.

“Unë kam përshtypjen se dikush mezi po pret të rrënohen, ato kulla që janë monumenti më i rëndësishëm i gjithë historisë tonë”.

Ndërsa, bëri të ditur se i njëjti projekt qëndron tash e gjashtë vite.

“Projekti për konservimin e kullave është i gatshëm që nga viti 2015 po dikujt nuk po i pëlqen edhe pse nuk e kanë parë fare. Projekti është punu nga Jozhe Dreshar që njihet si njëri ndër konservatorët më të mirë në Evropë”.

Por, përsëri ai thotë se “edhe kjo Qeveri fatkeqësisht nuk e ka seriozisht këtë punë. Shpresoj të me demantojnë”.

Për hulumtuesin në Institutin Albanologjik në Prishtinë, Valon Shkodra vendimi që ka ardhur nga ekzekutivi ka qenë shumë i nevojshëm.

“Lidhur me vendimin që të filloj puna për konservimin dhe restaurimin në shtëpitë e familjes Jashari, në fshatin Prekaz, është një vendim i qëlluar dhe i nevojshëm”, ka deklaruar Shkodra për Albanian Post.

Përveç kësaj ai thekson edhe rëndësinë e kompleksit memorial.

“Kompleksi Memorial Adem Jashari në Prekaz, përfshin një pjesë të trashëgimisë materiale dhe shpirtërore të historisë së re të Kosovës. Është një nga vendet më të vizituara në Kosovë. Është vend ku bëhen homazhe dhe përkujtohen dëshmorët e kësaj familjeje dhe të këtij fshati. Është vend që ka pasur vizitorë nga mbarë bota”.

Ndërkaq, pavarësisht premtimeve që u bën në të kaluarën, Shkodra, beson se do të punohet me përkushtim për investimin e kësaj kulle.

“Besoj që edhe konservimi dhe restaurimi i kompleksit do të bëhet me përkushtim dhe me të gjitha cilësitë e kërkuara në bazë të rregullave dhe standardeve ndërkombëtare”.

Ai shton se “nga paslufta e vitit 1999, e deri më tani, mund të themi se nuk ka pasur ndonjë monument kulturor më të diskutueshëm në Kosovë se sa Kompleksi Adem Jashari”.

Albanian Post, për investimin ndaj kësaj kulle ka kontaktuar edhe kryetarin aktual të Komunës së Skenderajt, Fadil Nura por që deri në publikimin e këtij shkrimi nuk ka pranuar përgjigje.

Përveç kësaj, AP ka kontaktuar edhe ish kryetarin e kësaj komune Bekim Jasharin lidhur me mungesën e investimeve edhe pse është ndarë buxhet për këtë kompleks memorial, por që nga i njëjtit nuk ka marrë përgjigje.

Kryeministri Kurti u shpreh se puna që do të bëhet në këtë komunitet do të jetë me standarde kombëtare e ndërkombëtare.

“Raporti është ndërtuar nga inxhinieret dhe profesorët e fakultetit të ndërtimtarisë, ndërkaq kjo është hera e parë që është realizuar një vlerësim i tillë profesional”, ka thënë Kurti.

Shefi i ekzekutivit, shtoi se nga lista e gjerë e miratuar në këtë komunitet tani janë nëntë emra vendor e ndërkombëtare.

“Në momentin e themelimit, komisioni do të jetë krahu i djathë i komunitetit duke siguruar që puna dhe vendimmarrja jonë bëhet në përputhje me të gjitha standardet profesionale, ligjore, kombëtare dhe ndërkombëtare”.

Përgjatë 20 viteve të çlirimit, Kompleksi memorial “Adem Jashari”, ka qenë pasqyra kyçe e luftës së fundit në Kosovë.

Gjatë sulmeve serbe të datave 5, 6 dhe 7 mars të vitit 1998 ranë dëshmorë 55 anëtarë të lagjes “Jashari”, 20 prej tyre të familjes së komandantit Adem Jashari.

Por ky kompleks, që flet shumë për historinë, ka filluar të mos i rezistojë kohës.

Në secilin prej mureve të shtëpive vërehen plasaritje të theksuara si pasojë e vjetërsisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.