“Porti i Durrësit do të jetë Dubai i Mesdheut. Në mbështetje për të do të hapim në bashkëpunim me kompaninë Emaar, një shkollë profesionale në Durrës”.
Kjo është deklarata e kryeministrit Edi Rama nga një takim elektoral në qytetin bregdetar, ku pritet të marrë jetë projekti i madh i portit turistik.
“Do të jetë më i madhi në Mesdhe”, premtoi Rama. “Dhjetëra profesione të reja do të hapen falë tij”.
Sipas kryeministrit, njerëzit më të pasur në botë do të ankorojnë jahtet e tyre në Durrës. Për shkak të kësaj, ata do të kërkojnë edhe shërbime luksi.
Për këto shërbime, stafet duhen trajnuar. Mbi të gjitha, të rinjtë durrsakë dhe të gjithë Shqipërisë.
Rama foli edhe për rindërtimin, pasi Durrësi është një ndër rajonet më të prekura.
“Dy mijë apartamente për të dëmtuarit e tërmetit do të ndërtohen. Lagjja e Spitallës, do të jetë lagjja më e bukur e Durrësit”.
Kryeministri e mori këtë zotim, duke premtuar ndërtime cilësore, të cilat sipas tij, nuk kanë marrë ende formë se duan kohën e tyre.
Kompania Emaar, implementuese e projektit, do të kryejë një investim prej 2 miliardë eurosh në portin e ri të Durrësit.
Sipas pasqyrimit që kryeministri ka bërë ditët e shkuara, e gjithë zona e portit do të shndërrohet. Pjesë infrastrukturore si hoteleri, rekreacion etj., do të jenë pjesë e zhvillimit.
Plani pritet të nisë brenda vitit 2023, pjesë e programit qeverisës 2021-2025 të Partisë Socialiste.
Emaar, është një ndër kompanitë udhëheqëse në botë për zhvillime infrastrukturore të tilla.
Nga ana tjetër, zhvillim do t’i jepet edhe Vlorës, nëpërmjet një aeroporti. Sipas ministres së Infrastrukturës dhe Energjisë, Belinda Balluku, me nisjen e projektit, aeroporti i Vlorës do të jetë më i madhi në Shqipëri.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
