Në një artikull të gjigandit mediatik “Politico” rreth strategjisë balancuese të presidentit serb, Aleksandër Vuçiç, në marrëdhëniet ndërkombëtare, i cili vazhdon të manovrojë mes fuqive globale, përmendet edhe fakti se ai përdorë minoritetin serb të Kosovës për t’i rritur tensionet etnike sa herë që dëshiron vëmendje nga Perëndimi.

“Sikurse kritikët vendas ashtu edhe ata ndërkombëtarë argumentojnë se ai është i aftë të përdorë pakicën serbe për të rritur tensionet sa herë që dëshiron vëmendje nga Perëndimi – dhe se ai nuk është më i interesuar për normalizimin e marrëdhënieve me Kosovën sesa për anëtarësim në Bashkimin Evropian (BE)”, ka theksuar “Politico”.

Aftësia e Vuçiçit për të qenë “gjithçka për të gjithë” i ka shërbyer mirë atij në skenën gjeopolitike, ka shkruar “Politico” në një artikull të fundit kushtuar marrëdhënieve të Serbisë me Rusinë dhe Kinën, krahas atyre me bashkësinë perëndimore në krye me Shtetet e Bashkuara (SHBA). “Ai ka arritur t’i bindë të gjithë se është në anën e tyre”.

“Përderisa Serbia ende e konsideron Kosovën një provincë të Serbisë, ai ka pranuar të marrë pjesë në një proces të mbikëqyrur nga BE për të ‘normalizuar’ marrëdhëniet dhe për të ndihmuar në hapjen e rrugës për të dy vendet për t’u anëtarësuar në BE”, ka kujtuar mediumi amerikan, duke sjellë pjesë nga intervista me presidentin serb.

Kur është pyetur nga “Politico” çfarë përfiton Serbia nga Rusia dhe Kina, duke pasur parasysh se investitorët më të mëdhenj në Serbi janë Gjermania, Franca dhe Italia, ai është përgjigjur shkurt: “Mbështetja e tyre për integritetin territorial të Serbisë”.

“Unë, një kukull ruse dhe agjent rus? Vetëm budallenjtë mund ta thonë këtë”, ka shtuar presidenti i Serbisë duke folur për marrëdhëniet me Rusinë. Ai ka pretenduar po ashtu se nuk ka pasur asnjë kontakt me presidentin rus, Vladimir Putin, për dy vjet e gjysmë.

Megjithatë, presidenti serb nuk e fsheh besimin se ai e kupton Putinin “më mirë se çdo lider tjetër evropian” dhe nuk heziton të lëvdojë Rusinë kur ajo përputhet me qëllimet e politikës së jashtme të Serbisë, ka shkruar mes tjerash “Politico” në këtë artikull.

Ndryshe, në këmbim të mbështetjes rreth Kosovës, shteti serb përkrah të gjitha autokracitë botërore që nuk e njohin pavarësinë e vendit të vogël. Serbia vazhdon të marshojë sipas një daulleje krejt të ndryshme nga bashkësia perëndimore, posaçërisht sa i përket deklaratave, rezolutave apo sanksioneve kundër regjimeve jodemokratike.