Policia ‘zbret në rrugë’ – arrestime – gjoba – pezullime

Policia Rrugore ka vijuar aksionin gjatë gjithë javës me qëllim parandalimin e aksidenteve rrugore, eliminimin e pengesave që krijojnë fluks në lëvizjen e automjeteve, si dhe ndjekjen e denoncimeve të qytetarëve.

Autoritetet bëjnë me dije se në këtë kuadër gjatë kësaj jave janë kapur e proceduar administrativisht 185 drejtues mjetesh që kryenin gara shpejtësie, manovra të rrezikshme në rrugë dhe shpejtësi tej normave të lejuara.

Gjithashtu janë ndëshkuar me masë administrative për parkime mbi trotuar, mbi vija të bardha e parkime paralele, që pengonin lëvizjen, 124 drejtues automjetesh luksoze.

Nga grupet e dedikuara të kontrollit, janë evidentuar dhe ndëshkuar 503 drejtues mjetesh, për përdorim të celularit gjatë drejtimit të automjetit.

Ndërsa, 361 drejtues mjetesh janë evidentuar për mospërdorim të rripit të sigurimit, 122 drejtues të motomjeteve për mosvendosje të kasës mbrojtëse, 290 drejtues mjetesh për parakalime të gabuara, 41 për drejtim mjeti nën efektin e alkoolit dhe 3 mijë e 789 masa të tjera për shkelje të ndryshme.

Në të njëjtën kohë janë arrestuar 23 drejtues mjetesh, nga këta 15 për drejtim mjeti në gjendje të dehur, katër për drejtim mjeti pa leje drejtimi dhe tre për shkelje të rregullave të qarkullimit rrugor, duke shkaktuar aksident dhe një shtetas për falsifikim të lejes së drejtimit.

Aksionit policor nuk i kanë shpëtuar dhe 129 persona për shkelje të ndryshme.

Janë pezulluar 40 leje drejtimi për drejtim të mjetit nën ndikimin e alkoolit, 70 raste për shpejtësi mbi normat e lejuara dhe 19 raste për shkelje të tjera të Kodit Rrugor.

Gjithashtu janë bllokuar 16 mjete, nga të cilat gjashtë mjete për moslikuidimin e gjobave dhe 10 mjete me targa të huaja dhe mjete luksi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.