Policia identifikon nëntë lokacione të postave ilegale në Veri

Policia e Kosovës ka njoftuar se ka identifikuar nëntë lokacione ku funksiononin posta ilegale në Veri, nga aksioni i zhvilluar të hënën, pas informatës së pranuar nga Autoriteti Rregullativ i Komunikimeve Elektronike dhe Postare (ARKEP), se në Kosovë operojnë operatorë ekonomik pa licencë dhe që nuk janë të regjistruar në Agjencinë për Regjistrimin e Bizneseve (ARBK).

“Sot gjatë ditës është duke u realizuar një operacion policor në Veri të Kosovës, i cili bazohet në informacionet zyrtare të institucioneve të Kosovës, siç është ARKEP, mbi dyshimin se janë duke operuar posta ilegale, të paregjistruara dhe pa licencë të institucioneve përkatëse të Republikës së Kosovës”, thuhet në njoftim të organeve të rendit.

“Bazuar në informacionet zyrtare kanë filluar hetimet policore në bashkëpunim dhe koordinim me organet e drejtësisë, ku deri më tani janë identifikuar nëntë lokacione ku funksiononin posta të tilla ilegale”.

Po ashtu, në njoftim u theksua se sipas detyrës zyrtare dhe autorizimeve ligjore e kushtetuese, PK-ja, po vazhdon angazhimet e saj në ofrimin e sigurisë, ruajtjen e rendit dhe sigurisë publike, si dhe ndërmarrjen e masave policore konform situatës dhe zhvillimeve në nivel vendi, përfshirë Veriun e Kosovës.

Në komunikatë të Policisë u potencua se të gjitha veprimet policore janë duke u realizuar në bashkëpunim dhe koordinim me institucionet kompetente dhe organet e drejtësisë, ku varësisht nga të gjeturat do të ndërmerren masat e mëtejme ligjore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.