Policia e Kosovës ofron garanci që Kadri Veseli të mbrohet nga arresti shtëpiak

Është bërë edhe një kërkesë nga mbrojta e Kadri Veselit për lirimin e tij nga qendra e paraburgimit në Hagë dhe për të vazhduar me masën e arrestit shtëpiak, ku edhe Policia e Kosovës ka dhënë një garanci për këtë.

Në letrën e dy avokatëve të Veselit, Ben Emerson dhe Andrew Strong, dërguar Gjyqtarit të Procedurës Paraprake, frencezit, Nicola Guillou, edhe drejtori i Policisë së Kosovës, Samedin Mehmeti, ka dhënë një garanci të qartë, ku thuhet se zvogëlon rrezikun e vetëm të identifikuar nga Gjyqtari i Procedurës Paraprake në vendimin e mëparshëm.

Mbrojtja ka konfirmuar se kanë marrë edhe një letër nga kreu i Policisë së Kosovës.

“Policia e Kosovës është më se e aftë dhe e gatshme që të zbatojë çfarëdo kushti apo urdhri të vendosur nga Gjykatësi i Procedurës Paraprake për Lirimin e Përkohshëm ose ndonjë çështje tjetër”, të Kadri Veselit.

Policia e Kosovës është e pajisur më mirë për të zbatuar urdhrat e Gjykatës sesa njësitet në Qendrën e Paraburgimit.

Mbrojtja tutje thotë se angazhimi i detajuar i marrë nga Policia e Kosovës ndryshon qartazi rrethanat dhe në mënyrë direkte zvogëlon rrezikun që Gjyqtari i Procedurës Paraprake kishte përmendur në vendimin paraprak për çështjen e Arrestit Shtëpiak.

Në dokumentin e mbrojtjes thuhet se në vendimin e mëparshëm, Gjyqtari i Procedurës paraprake kishte ngritur shqetësime hipotetike se mund të kishte biseda të pa monitoruara të Kadri Veselit me familjarët dhe vizitorët, gjë që mund të pengonin përparimin e mëtejmë të procedurave të Dhomave të Specializuara.

Në vendimin e mëparshëm të gjykatës, siç thekson dokumenti i mbrojtjes, ishte potencuar edhe rreziku i kryerjes së ndonjë krimi tjetër.

Mbrojtja e Veselit ka kërkuar nga Gjyqtari i Procedurës Paraprake që të lirojë klientin e tyre nga paraburgimi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.