Policia dhe Prokuroria me aksion në disa lokacione të Kosovës

Policia e Kosovës dhe Prokuroria Themelore në Prishtinë, janë duke kryer një aksion të përbashkët në disa lokacione në Kosovë, nën dyshimin për kryerje të disa veprave penale.

Lajmin për Albanian Post e ka konfirmuar zëdhënësja e Prokurorisë Themelore në Prishtinë, Laureta Ulaj.

“Kryeprokurori i Prokurorisë Themelore në Prishtinë, Zejnullah Gashi, njofton se nën udhëheqjen e kësaj prokurorie, më konkretisht nga Departamenti për Krime Ekonomike dhe Korrupsion, në koordinim të plotë me Policinë dhe pas aprovimit të Gjyqtarit të Procedurës Paraprake, është duke u zhvilluar një aksion që nga mëngjesi, përfshirë disa lokacione në nivel në Kosovës”.

“Mbi dyshimin e kryerjes së veprave penale nga persona zyrtarë e qytetarë, më konkretisht dyshim mbi kryerjen e veprave penale “Mashtrimi në detyrë”, “Dokumentet e rrejshme lidhur me tatimin” dhe “Shmangia nga tatimi”.

Ulaj, ka potencuar se pasi që të përfundoj aksioni do të dalin me detaje nga ky aksion.

“Prokuroria Themelore në Prishtinë do t’iu njoftojë me kohë për zhvillimet nga ky aksion, pasi të mbarojë i tëri”, ka deklaruar ajo për Albanian Post.

Më 5 janar po ashtu, Policia e Kosovës kishte zhvilluar një aksion në Banjë të Zveçanit me qëllim verifikimin e terrenit, meqë të enjten, policia pikërisht në vendin ku ndodhi edhe sulmi terrorist, sekuestroi një flamur të shtetit të Serbisë, 34 gëzhoja, një karikator të armës AK-47 dhe 689 fishekë të kalibrave të ndryshëm.

“Është një veprim policor që është duke u ndërmarrë nga ana e Policisë së Kosovës me qëllim verifikimin e terrenit për ndonjë send të dyshimtë, si armë, municion ose diçka tjetër që ka mbetur nga rasti i Banjës”, deklaroi zëvendësdrejtori i Policisë së Kosovës për rajonin e Veriut, Veton Elshani, shkurtimisht për Albanian Post.

Policia e Kosovës, kishte patrulluar rrugët në fshatin Banjë të Zveçanit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.