![](https://albanianpost.com/wp-content/uploads/2022/04/kiiiiop1-852x460-1.png)
Kryetari i Sindikatës në Korporatës Energjetike të Kosovës, Nexhat Llumnica, ka folur në lidhje me konkursin e hapur për punësime në KEK, duke thënë se nuk ka parë asgjë tjetër veçse vazhdimësi të pushteteve të kaluara.
Ai tha se qëllimet e konkurseve janë partiake, dhe se KEK po vuan nga partitë politike.
“Ne nuk kemi parë asgjë tjetër përveçse vazhdimësi e pushteteve të kaluara”, ka deklaruar, Nexhat Llumnica.
“Normalisht që nepotizmi ka ekzistuar gjithmonë në krejt Kosovë dhe në KEK, dhe sot po vazhdon ne shumë shpesh kemi kërkuar që të jemi edhe ne në cilësinë e vëzhguesit, por asnjëherë s’kemi pranuar si sindikatë dhe normalisht qëllimet janë partiake”, është shprehur Llumnica.
“Qëllimet janë partiake KEK-u po vuan nga partitë politike. Konkurset janë anuluar për shtyrje të partive politike edhe sot po ndodhë”.
![](https://albanianpost.com/wp-content/uploads/2022/04/Nexhat-Llumnica-1-e1649226718906.jpg)
Në dy ditët e fundit në adresë të partisë në pushtete, Vetëvendosje, janë drejtuar kritika e akuza të shumta me pretendimet se zyrtarë nga ky subjekt politik kanë interferuar në konkursin e fundit në Korporatën Energjetike të Kosovës duke punësuar militantë partiakë dhe familjarë të tyre.
Pas këtyre akuzave publike Prokuroria Themelore në Prishtinë ka iniciuar hetime lidhur me këto punësime.
Publikisht akuzat nisën nga zëdhënësja e LDK-së, Sibel Halimi, e cila reagoi duke thënë se LVV ka punësuar militantët e vet partiakë dhe ka bërë padrejtësi në konkursin e Korporatës Energjetike të Kosovës (KEK).
Më pas edhe kryetari i LDK-së, Lumir Abdixhiku akuzoi partinë që udhëheqë me Qeverinë e Kosovë se i kishte paracaktuar personat që do të punësoheshin nga konkursi publik.
Abdixhiku shtoi se LVV po zëvendëson kapjen e shtetit me një kapje të re. Për këtë ai paralajmëroi kallëzim penal në Prokurori dhe kërkoi anulimin e konkursit.
Mirëpo, Prokuroria Themelore e Prishtinës ka reaguar pa pritur që Abdixhiku të bëjë kallëzim penal.
I zëshëm për këtë situatë ishte edhe nënkryetari i PSD-së, Nol Nushi, i cili ndër të tjera ka thënë se deri më tani nuk është parë një punësim kaq masiv të familjarëve dhe militantëve në një ndërmarrje publike.
“Paramendojeni nga 4,600 qytetarë që kanë aplikuar ti i ke gjetur 126 familjarë për t’i punësuar. Kjo tregon për një ndërmarrje të pastër punësimi që është bërë në mënyrë të jashtëligjshme. Do të duhej të mjaftonte vetëm kjo që ky konkurs të anulohet”, kishte deklaruar Nushi.
Në anën tjetër, Korporata Energjetike e Kosovës, përmes një komunikate për media ka reaguar për këtë situatë të krijuar.
“Në këtë drejtim, KEK ju siguron se të gjithë ankesat do të shqyrtohen me kujdesin më të madh, duke rishikuar procesin, do të korrigjohen gabimet e evidentuara si dhe do të merren masa adekuate komfor ligjit, kudo që do të ketë pasur shkelje në proces”, thuhet në njoftimin e KEK-ut.
Prokuroria Themelore në Prishtinë, përmes një komunikate për media ka konfirmuar se pas raportimeve, kanë filluar hetimet në lidhje me punësimet e reja në një konkurs të Korporatës Energjetike të Kosovës.
Organi i akuzës ka bërë të ditur se do të ndërmerren të gjitha veprimet e nevojshme hetimore me qëllim të sqarimit të plotë të këtyre pretendimeve, komfor dispozitave ligjore në fuqi.
Por, kryeministri i Kosovës, Albin Kurti, ka mohuar në mënyrë kategorike raportimet e disa mediave në Kosovë, se të punësuarit e fundit në Korporatën Energjetike të Kosovës kanë lidhje familjare apo janë militantë të Lëvizjes Vetëvendosje.
Prokuroria Themelore në Prishtinë ka njoftuar opinionin publik se Departamenti i Krimeve të Rënda, konkretisht Njësiti për Krime Ekonomike dhe Korrupsion, pas raportimeve të publikuara në disa portale lidhur me pretendimet se janë kryer shkelje të rënda ligjore në procesin e rekrutimit të qindra personave në një konkurs të Korporatës Energjetike të Kosovës (KEK), më 04.04.2022, ka iniciuar hetime, ashtu që do të ndërmerren të gjitha veprimet e nevojshme hetimore, me qëllim të sqarimit të plotë të këtyre pretendimeve, komfor dispozitave ligjore në fuqi.
![](https://albanianpost.com/wp-content/uploads/2021/12/albulena-haxhiuu.jpg)
Fillimin e këtyre hetimeve e ka mirëpritur Ministrja e Drejtësisë në Kosovë, Albulena Haxhiu, duke thënë se çdo pretendim për parregullsi të mundshme duhet të merr epilogun nga drejtësia.
Por, ajo ka thënë se akuzat e tilla kanë më tepër për qëllim ta dëmtojnë Vetëvendosjen.
“Vetëvendosje nuk ka ndikuar dhe nuk do të ndikojë asnjëherë në procese të tilla. Vetëm personat që e meritojnë t’i marrin ato pozita do t’i marrin. Asnjëherë kriter për punësime s’do të merret anëtarësia partiake. Të gjithë qytetarët e Kosovës duhet të trajtohen të barabartë“, ka deklaruar Haxhiu për RTK.
Lidhur me akuzat për punësime partiake, është deklaruar të martën edhe Albin Kurti, i cili ka thënë se në qeverisjen e tij nuk ka punësime të militantëve.
“Janë komisionet ato të cilat bëjnë përzgjedhjen e të punësuarve”, ka deklaruar ai.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com