“Po, jam shkarkuar”, konfirmohet raportimi i Albanian Post për shkarkimin e zyrtarit që hetonte Berishajn e Krasniqin

Shemsi Haziri, shefi i Njësisë së Veçantë të Hetimeve, (ish-Task Forcës kundër Korrupsion) brenda Policisë së Kosovës, ekip që udhëhiqte hetimet ndaj ambasadorit të Kosovës në Kroaci, Martin Berishaj dhe ish-kryeshefit të Korporatës Energjetike të Kosovës, Nagip Krasniqi, ka konfirmuar se është shkarkuar nga kjo pozitë.

“Po, po. Jam i shkarkuar. Ma kanë konfirmu”, ka thënë Haziri për Nacionale.com, duke konfirmuar kështu raportimin e Albanian Post.

Ndonëse Albanian Post, nga burime të mirinformuara kishte raportuar se shkarkimi i Hazirit lidhet pikërisht me hetimet e tij ndaj ish-kryeshefit të KEK-ut, Nagip Krasniqi, ky i fundit i ka thënë Nacionale.com, se nuk i di arsyet e shkarkimit, duke shtuar se e kanë paralajmëruar se të hënën do të marrë vendimin dhe arsyen e shkarkimit.

“Nuk i di arsyet, nuk mi kanë thënë. Vendimin së bashku me arsyetim, kanë thënë se do të ma dorëzojnë të hënën”, ka shtuar ai.

I pyetur se a dyshon se shkarkimi i tij ka ardhur si rezultat i hetimeve ndaj Nagip Krasniqit dhe Martin Berishajt, Haziri ka refuzuar të përgjigjet.

“Ju lutem, mos më bëni pyetje më shumë, mbetet të shihet të hënën”, ka thënë Haziri.

Sharkimi i Hazirit, siç raportoi Albanian Post, ndodhi të premten.

Shkarkohet Shemsi Haziri, shefi i ekipit që udhëhiqte hetimet ndaj Martin Berishajt e Nagip Krasniqit

Aktualisht ish-shefi i KEK-ut Krasniqi gjendet në paraburgim, derisa arrestimin e tij e pati kritikuar ashpër Kryeministri i Kosovës, Albin Kurti.

Kryeministri Kurti, gjatë fjalimit të tij në seancën plenare, një ditë pas arrestimit të kryeshefit të Korporatës Energjetike të Kosovës, Nagip Krasniqit, nga Policia e Kosovës nën dyshimin për keqpërdorime në disa tenderë, një prej tyre 3.4 milionë euro, me 20 prill, kishte sulmuar Kryeprokurorin e Prokurorisë Speciale, Blerim Isufaj, i cili kishte dhënë dritën e gjelbër për nisjen e hetimeve në rastin e kryeshefit Krasniqi.

“Natyrisht që udhëheqja e re e KEK-ut ka deponuar me dhjetëra fakte e dëshmi materiale për keqpërdorimet që i ka gjetur aty, mirëpo zelli i Prokurorisë për t’u marrë me deponimet e fakteve e dëshmimeve për keqpërdorimet e mëhershme ka qenë zero, ndërsa zelli për t’u marrë me kryeshefin Krasniqi i cili në vitin 2022, bashkë me ekipin e vetë ja solli 107 milionë euro fitim, ishte maksimal”, thoshte Kurti në mbrojtje e sipër të Krasniqit.

Kurti më tej gjatë fjalimit të tij kishte sulmuar drejtpërdrejtë edhe prokurorin i cili u mor me rastin e kryeshefit të KEK-ut, Blerim Isufajn duke thënë se ky i fundit nuk e kishte të fituar në Gjykatë asnjë rast dhe i njëjti po dëshironte të bëhet kryeprokuror i shtetit përkundër vullnetit të presidentes, kryeparlamentarit dhe kryeministrit.

“Është siklet i madh dhe është mbështetje e madhe për një njeri i cili përkundër tre krerëve shtetëror përkundër përvojës së hidhur që ka i gjithë vendi me të dëshiron të bëhet kryeprokurorë”.

Drejtësia dhe sistemi gjyqësor në Kosovë, sipas Kurtit, po lëngonte pikërisht për shkak se ekziston një prokurori e cila nganjëherë, nuk dëshiron, nganjëherë nuk di e shpeshherë edhe të dyja.

“Është e vërtet që unë e kam kritikuar publikisht prokurorinë e shtetit, sidomos atë speciale, që për rastet e krimeve të luftës ka qenë përgjithësisht pasive”.

Ndërsa, për aferat korruptive të Nagip Krasniqit, Albanian Post kishte publikuar disa dokumente të cilat implikonin ish-shefin e KEK-ut.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.