Mesfushori i Tottenham, Rodrigo Bentancur është akuzuar nga Federata e Futbollit Anglisë (FA) për përdorimin e një fyerje racore drejtuar shokut të skuadrës Heung-min Son.
Në qershor, gjatë një paraqitjeje në një televizion uruguaian, Bentancur u pyet nga një prezantues për marrjen e një fanelle të Tottenham-it dhe u përgjigj: “E Sonny? Mund të jetë edhe kushëriri i Sonny-t, pasi të gjithë duken njësoj”.
Bentancur më vonë shkoi në Instagram për të kërkuar falje, duke i përshkruar komentet e tij si një “shaka shumë e keqe”.
FA njoftoi se 27-vjeçari uruguaian është akuzuar për një shkelje të pretenduar të rregullit E3 të FA për sjellje të pahijshme në lidhje me një intervistë në media.
“Është pretenduar se mesfushori i Tottenham Hotspur ka vepruar në mënyrë të pahijshme dhe ka përdorur fjalë fyese”, deklaroi organi drejtues i futbollit anglez.
FA shtoi se kjo përbënte një “shkelje të rëndë, pasi përfshinte një referencë, qoftë të shprehur apo të nënkuptuar, për kombësinë dhe/ose racën dhe/ose origjinën etnike”.
Sipas rregulloreve të FA, mesfushori mund të vuajë “nga 6-12 ndeshje për pothuajse të gjitha aktet e diskriminimit”.
Bentancur ka afat deri të enjten, 19 shtator, për t’iu përgjigjur akuzës. Ndalimi nuk do të shtrihej në futbollin evropian, duke e lejuar lojtarin të marrë pjesë në ndeshjet e skuadrës së tij në Europa League.
Në atë kohë, organizata bamirëse kundër diskriminimit “Kick It Out” raportoi se kishte marrë një “numër të konsiderueshëm” ankesash në lidhje me sharjen racore të Bentancur, duke theksuar “një çështje më të gjerë që prek shumë komunitetet e Azisë Lindore dhe më gjerë”.
Heung-min deklaroi se Bentancur i kishte kërkuar falje për komentet e tij, dhe që atëherë të dy janë ribashkuar te Spurs për sezonin e Premier League.
“Kam folur”, tha Son në qershor. “Ai bëri një gabim, ai e di këtë dhe ka kërkuar falje. Nuk donte të thoshte ndonjëherë diçka fyese. Jemi vëllezër dhe asgjë nuk ka ndryshuar”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
