Plani i Trump për paqen në Ukrainë: Nuk ka ndihma amerikane nëse Kievi nuk ulet për të negociuar

Ukraina do të ketë ende armë amerikane vetëm nëse ulet për të negociuar me Moskën.

Mirëpo, nëse Rusia nuk bën të njëjtën gjë, fluksi i ndihmës për Kievin do të rritet.

Kështu parashikohet nga plani i studiuar nga dy këshilltarë të rëndësishëm të Donald Trump në politikën e jashtme për t’i dhënë fund konfliktit që filloi me pushtimin e ushtrisë së Vladimir Putinit më 22 shkurt 2022, për t’u zbatuar në rast se ish-presidenti kthehet në Shtëpinë e Bardhë më 20 janar 2025.

Për të bindur carin e ri rus që të negociojë, plani parashikon gjithashtu një armëpushim që do të zbatohet duke ngrirë vijën e frontit të vendosur nga fusha e betejës dhe po ashtu pranimi i Ukrainës në NATO, siç kërkohet nga Kremlini.

Detajet u zbuluan në një intervistë për Reuters, gjenerali Keith Kellogg dhe Fred Fleitz  – afër John Bolton, ish-ambasador amerikan në OKB, ku ai ishte shef i shtabit – të cilët ishin së bashku në Këshillin e Sigurisë Kombëtare në kohën e administratës Trump midis viteve 2017 dhe 2021.

Nëse zbatohet, plani do të shënonte një ndryshim vendimtar të qëndrimit nga ana e SHBA-ve, e cila deri më tani ka dërguar ndihma ushtarake.

Shumë analistë besojnë se një propozim i tillë do të sillte përfitime për Rusinë në tryezën e bisedimeve.

“Ajo që Kellogg dhe Fleitz po propozojnë”, shpjegoi Daniel Fried, një ish-zëvendës sekretar i shtetit që ndoqi dosjet ruse,  është “një proces që do ta çonte Ukrainën t’i dorëzonte rusëve të gjitha territoret e pushtuara”.

Megjithatë, të dy këshilltarët do t’ia kishin paraqitur planin Trumpit, i cili – sipas asaj që Fleitz, aktualisht nënkryetar i institutit ultra-Trumpian America First, anëtar i të cilit është gjenerali Kellogg, do të ishte përgjigjur në mënyrë të favorshme.

“Nuk po them se pranoi, apo se çdo fjalë ishte e mirë, por ne u kënaqëm me përgjigjen e tij”, shpjegoi ish-anëtari i Këshillit të Sigurisë Kombëtare.

Zëdhënësi i ish-presidentit, Steven Cheung, sqaroi se vetëm deklaratat e autorizuara nga fushata zgjedhore duhet të konsiderohen zyrtare, duke shtuar se një negociatë e shpejtë për t’i dhënë fund luftës në Ukrainë do të jetë një prioritet i mandatit të dytë të Trump.

“Kjo luftë nuk do të kishte ndodhur kurrë nëse ai do të kishte qenë president”, sipas Cheung.

“Është shumë e trishtueshme”.

Kandidati republikan ka pohuar shpesh se ai mund t’i jepte fund luftës pa hyrë në detaje.  Prandaj, ai i dy këshilltarëve është propozimi i parë konkret i paraqitur nga njerëz të afërt me Trumpin.

“Ne duhet t’u themi ukrainasve se ata duhet të vijnë në tryezë, përndryshe mbështetja e SHBA-ve do të bjerë në mënyrë progresive”, shpjegoi Kellogg.

“Në të njëjtën kohë, ne duhet t’i themi Putinit se ai duhet të ulet në tryezë, përndryshe ne do t’u japim ukrainasve gjithçka që u nevojitet për ta mposhtur atë në fushë”.

Sipas Fleitz, Ukraina nuk do të duhet domosdoshmërisht të heqë territorin, por beson se nuk ka gjasa të rimarrë kontrollin e të gjitha rajoneve të saj në një afat të shkurtër.

“Frika jonë është se lufta në Ukrainë do të bëhet një luftë rrënimi, një lloj që vret një brez të tërë”.

Për të ruajtur paqen – besojnë dy autorët – do të nevojiten edhe garancitë e sigurisë për Kievin, të cilat, sipas Fleitz, do ta bëjnë të nevojshme “armatosjen e Ukrainës deri në dhëmbë”.

Marrë nga “Corriere della Sera”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.