Pique i jep lamtumirën Barcelona-s dhe futbollit të luajtur

Barcelona u ndesh me Almeria-n në “Camp Nou” për javën e 13-të të La Liga-s spanjolle. Katalanasit triumfuan 2-0, në ndeshjen e fundit të kapitenit, Gerard Pique me fanellën e tyre.

Pique e nisi si titullar ndeshjen dhe luajti deri në minuten e 84, kur u zëvendësua nga Andreas Christensen, për të marrë një “standing ovation” nga të gjithë të pranishmit në “Camp Nou”. 35-vjeçari ndryshe nga çfarë është paraqitur në ndeshjet e fundit, ishte një nga lojtarët më të mirë në fushën e blertë.

Piqué is in tears as he receives a standing ovation from the fans at the Camp Nou, while leaving the pitch.

Gracias Legend ❤️ #Sempr3 pic.twitter.com/xAGfk8wA41

— FCB One Touch (@FCB_OneTouch) November 5, 2022

Mbrëmjen e të enjtes së 3 nëntorit, mbrojtësi legjendar i skuadrës së Barcelona-s njoftoi në mediat sociale se do të tërhiqet nga futbolli.

“Gjithmonë kam thënë se nuk do të kishte asnjë klub tjetër jashtë Barçës dhe kështu do të jetë ”, tha ai në një video përmes së cilës njoftoi fundin e aventurës së tij në futboll.

Përsa i përketë ndeshjes, Barcelona kaloi në avantazh me golin e sulmuesit francez, Osumane Dembele në minutën e 48 të pjesës së dytë. Në pjesën e parë katalanasit humbën një 11 metërsh (7’) me sulmuesin polak, Robert Lewandowski.

Frenkie de Jong do të dyfishonte rezultatin në minutën e 62. Goli i holandezit vulosi shifrat përfundimtare të takimit.

Me fitoren e arritur, Barcelona rimerr përkohësisht kreun e La Liga-s me 34 pikë. Dy pikë më shumë se Real Madrid-i i vendit të dytë, por që ka një ndeshje më pak.

Lamtumira e Pique

Sipas gazetës spanjolle “Marca”, Pique e informoi personalisht Joan Laporta-n, presidentin e klubit blaugrana, javën e kaluar për vendimin e tij për t’u tërhequr, duke pretenduar se ishte në interesin më të mirë të tij dhe klubit.

Laporta i kishte kërkar Pique-s që lamtumirën ta zyrtarizonte në një konferencë. Por, mbrojtësi kishte preferuar më shumë shpalljen e saj në mediat sociale.

The Last Dance@3gerardpique #Sempr3 pic.twitter.com/Va9D4ACVY1

— FC Barcelona (@FCBarcelona) November 5, 2022

35-vjeçari u rrit në klubin e Barcelona-s, derisa pak vite i kaloi edhe te Manchester United nga 2004-2008. Ai në total numëron 615 ndeshje me skuadrën katalanase, nga ku ka shënuar dhe 52 gola.

Ndërkohë, me fanellën e Barçës, Pique ka fituar 30 trofe, duke përfshirë tre herë Champions League-n, tetë herë La Liga-n, shtatë herë Kupën e Spanjës, gjashtë herë Superkupën e Spanjës dhe nga tre herë Superkupën e Evropës dhe Kupën e Botës për Klube.

Ndërsa në total në nivel klubesh, Pique numëron 666 ndeshje si profesionist, 58 gola dhe 14 asistime. Me Kombëtaren e Spanjës, ai ka arritur 102 takime, pesë gola dhe tre asistime. Mbrojtësi është gjithashtu kampion i FA Cup në 2005, Superkupës së Anglisë në 2007, Premier League në 2008, i Botës në 2010 dhe Evropës në 2012.

Duke shpallur pensionimin e tij, ai i ka kursyer klubit mbi 50 milionë euro. Pique ka hequr dorë nga paratë edhe më parë, duke marrë shkurtime pagash dhe duke shtyrë pagën e tij në një përpjekje për të ndihmuar klubin. Megjithatë, pagesat e shtyra të cilat klubi i detyrohet mbrojtësit do të jepen.

Pas ndeshjesh, Pique foli fjalët e fundit si futbollist i Barcelona-s, duke thënë “Në jetë, kur rritesh, kupton se ndonjëherë të duash dikë duhet ta lësh të shkojë. Jam i bindur se do të jem përsëri këtu në të ardhmen”.

“Unë e dua Barçën. Kjo është arsyeja pse unë konsideroj se është momenti i duhur për të shkuar. Kjo nuk është një lamtumirë. Kam lindur këtu, do të vdes këtu”.

"A veces querer es dejar marchar"

El momento en el que @3gerardpique se rompió diciéndole adiós al club de su vida @FCBarcelona_es #LaLigaEnDAZN ⚽ pic.twitter.com/RuUXcCTeLC

— DAZN España (@DAZN_ES) November 5, 2022

Për Pique, ky nuk shihet si fundi i lidhjes së tij me Barcelona-n. Spanjolli ka dëshirë të kthehet në “Camp Nou” si president i klubit në të ardhmen.

Pique pritet të mos jetë i vetmi nga tre kapitenët kryesor të Barcelona-s që do të largohet nga klubi. Jordi Alba dhe Sergio Busquets gjithashtu flitet se do të lënë skuadrën aktuale për të vazhduar karrierën diku tjetër.

Mbrojtësi i mjatë, Alba ka oferta nga Serie A, me Inter, Napoli dhe Juventus të interesuar për ta nënshkruar gjatë merkatos së janarit.

Busquets është në vitin e fundit të kontratës me Barcelona-n dhe nuk ka shenja rinovimi në horizont, pasi klubi i ka ofruar një marrëveshje jo shumë të favorshme nga ana ekonomike. Në fund të sezonit, ai pritet të trasferohet me parametra zero në MLS-në amerikane.