![](https://albanianpost.com/wp-content/uploads/2024/04/petka-2.jpg)
Drejtori i të ashtuquajturës “Zyrë për Kosovë” në Qeverinë e Serbisë, Petar Petkoviç, nëpërmjet një postimi në platformën “X” të hënën, sulmoi ambasadorin gjerman në Prishtinë, Jorn Rohde, i cili konsideroi se mospjesëmarrja e Listës Serbe në proceset demokratike, përveçse është shumë shqetësuese, paraqet edhe një rast tjetër presioni ndaj serbëve në veri.
E korrieri kryesor i propandës serbe, pas akuzave të subjektit më të madh politik të serbëve të Kosovës se ndërkombëtarët janë “verbuar nga dashuria” për “regjimin autoritar” të kryeministrit kosovar, Albin Kurti, pretendoi se ambasadori gjerman tenton ta fshehë “mungesën e demokracisë” në Kosovë, duke sulmuar Listën Serbe dhe përkrahur “kryetarë të rrejshëm”.
“Ju asnjëherë nuk e përmendni presionin e pamasë të Kurtit ndaj serbëve; keni përkrahur kryetarë të rrejshëm komunash në veri dhe padyshim që vazhdoni ta bëni këtë. Ku keni parë një komunë të kandidojë me vetëm 3.5 për qind të votave? Sigurisht jo në Gjermani!”, shkroi Petkoviçi.
Ndryshe, katër anëtarë të komisioneve komunale zgjedhore (KKZ) në veri nga partia kryesore e serbëve të Kosovës janë dorëhequr nga pozita në katër komunat veriore – Mitrovicë e Veriut, Zveçan, Zubin Potok dhe Leposaviq – një ditë pas paralajmërimit serbët s’do të marrë pjesë në referendumin që pritet të mbahet më 21 prill për largimin e kryetarëve shqiptarë.
Në bazë të udhëzimit administrativ që mundëson largimin e kryetarëve të komunave nga shtatori i vitit të kaluar, duhet 50 për qind, plus një votë e qytetarëve me të drejtë vote që referendumi të ketë sukses. Pas kësaj, rezultati i dërgohet presidentes së Kosovës, Vjosa Osmani, e cila ka afat ligjor prej 30 deri në 45 ditë për të shpallur mbajtjen e zgjedhjeve të parakohshme.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com