Pesë gola, tri pikë, një fitues, Bilbao fiton me një super ndeshje përballë Betis-it

Gabon edhe një nga skuadrat kryesuese në La Liga.

Vendi i tretë i Real Betis, ishte mysafirë në “San Mames”, në një fushë shumë të vështirë përballë baskëve të Athletic Bilbao-s.

Ndeshja jetoj në bazë të pritshmërive të saj – dhe doli të jetë shumë e bukur.

U deshën vetëm dy minuta lojë që rrjeta të tundej për herën e parë, dhe ishin vendasit ata që shënuan.

Golin e parë e shënoi Inaki Williams, pas një asistimi shumë të bukur të Iker Munianin.

Se çfarë ndeshje do të ishte, tregoi fakti që Juanmi barazoi në minutën e gjashtë.

Me rezultat 1-1 u mbyll edhe pjesa e parë, me të dytën që do të vendoste të gjitha.

Minuta e gjashtë ishte me fat për Betis-in, që shënuan në atë minutë në pjesën e dytë.

Nabil Fekir gjeti rrugën e rrjetës për epërsinë e parë të Betis, që do të ishte edhe e fundit.

Në minutën e 72-të, protagonist për Bilbao-n ishte përsëri Inaki.

Me një lëvizje shumë të bukur ai shënoi për 2-2, duke e dërguar ndeshjen drejt një fundi të mrekullueshëm.

Kur u duk se ndeshja po mbyllej në barazim, De Marcos u ngjit në skenë duke shënuar për 3-2, që do të ishte edhe rezultati përfundimtar.

Bilbao ngjitet në vendin e nëntë me 24 pikë, kurse Betis ndodhet në vendin e tretë me 33 pikë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.