Pesë deputetë të opozitës bashkë kundër listave të mbyllura: T’i dorëzohet popullit e drejta të vendosë

Pesë deputetë të opozitës – Dashamir Shehi, Enkelejd Aliebajt, Flutura Açka, Arbi Agalliu dhe Selaudin Jakupllari – janë bërë bashkë kundër listave të mbyllura.

Në një deklaratë të përbashkët për median ata kanë bërë me dije po ashtu se mbështesin drejtësinë.

“Një qëndrim i qartë dhe i saktë pa ekuivok në mbështetjen e drejtësisë. Raportet me partnerët strategjikë janë të domosdoshme”.

“Ne që jemi këtu mendojmë që sot opozita por dhe parlamenti është distancuar vite dritë larg nga publikut. Një nga elementet është vota përmes listave të hapura”, ka shtuar Alibeaj.

“Është e udhës që sot t’i dorëzohet popullit e drejta të vendosë dhe një nga këto është vendimi për të dalë me lista të hapura”.

Ndërkohë, Shehi është shprehur i bindur se nuk janë vetëm pesë deputetë kundër listave brenda në sallën e Kuvendit dhe i nxit ata të bashkohen.

“Për të menduar gjysma e parlamentit e mendon si ne, por ne momentalisht jemi 5. Opozita duhet të hapë një trajektore të re, një shteg të ri politik. Nëse nuk jemi të zot të bëjmë kaq atëherë”.

Sa i përket prezantimit të tyre në zgjedhjet e reja, ata kanë thënë se ende nuk është e qartë.

“Mund të prezantohemi si bashkim partish. Thirrja jonë nuk është vetëm për kolegët, por i thërrasim dhe partive të tjera jo parlamentare, flukseve të tjera jo të formalizuara dhe elitës shqiptare”, ka thënë Shehi.

“Që do të prezantohet në formën e një bashkësie politike, do të aplikojmë sistemin me lista të hapura”.

Alibeaj sakaq ka shtuar se ka vend për të gjithë për të garuar me kushte të barabarta me lista të hapura.

“Akses për të gjithë dhe përballje me popullin shqiptar”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.