Platformat e mediave sociale janë mbushur me video që tregojnë përmbytjet që kanë goditur Italinë, ndërsa autoritetet kanë shpallur alarm të kuq për motin e keq.

Përmbytjet e shkaktuara nga shirat e dendur që nga e enjtja kanë lënë të vrarë ndërkohë tre persona në veriperëndim të Italisë, njoftuan mediat lokale.

Dy nga viktimat u gjetën të premten pasi automjetet e tyre kishin rënë në një gropë të hapur, ndërsa i treti u gjet i bllokuar brenda shtëpisë së tij të enjten, sipas transmetuesit publik të Italisë Rai.

Veriu i Italisë është përballur me stuhitë e fuqishme që kanë shkaktuar rrëshqitje dheu dhe dëme të shumta materiale.

Rrugët dhe vendkalimet janë zhytur nën ujë, ndërsa pamje të tjera zbulojnë fusha të tëra të përmbytura.

Situata mësohet se paraqitet veçanërisht e rëndë në rajonin Piemonte, i cili ka shpallur gjendje të jashtëzakonshme që nga e enjtja, për shkak të kushteve ekstreme të motit.

Rajoni i Piemontes është përballur me mot të ashpër që nga e enjtja pasi shiu i rrëmbyeshëm dhe erërat e forta rezultuan në përmbytje të përhapura.

Autoritetet fillimisht vendosën rajonin nën një alarm të kuq, niveli më i lartë i paralajmërimit, pasi lumenjtë u tejmbushën dhe shërbimet rrugore dhe hekurudhore u ndërprenë.

Edhe pse një “përmirësim i lehtë” u raportua të premten, Piemonte mbetet në gatishmëri portokalli për shkak të rrezikut të vazhdueshëm.

Sakaq, moti ekstrem ka shkaktuar edhe ndërprerje të energjisë elektrike dhe ka lënë disa shtëpi të izoluara. Operacionet e shpëtimit janë duke vazhduar në të gjithë rajonin.