Lajme

Përkushtimi gjerman, Scholz sot në Kosovë


Olaf Scholz ateron në Prishtinë, pritet nga kryeministri Albin Kurti

Vizita e paralajmëruar e kancelarit gjerman, Olaf Scholz, në Kosovë dhe Serbi, në kuadër të turit të tij dyditorë në Ballkanin Perëndimor, sipas njohësve të politikave të Bashkimit Evropian, në parim është një hap i duhur, e cila në thelb dëshiron të tregojë një përkushtim të shtuar të qeverisë gjermane për rajonin në përgjithësi.

Vizita e kancelarit Scholz, është vizita e tretë e një përfaqësuesi të nivelit të lartë të shtetit gjerman brenda më pak se tre muajve, e cila po ndodh në kohën kur po organizohet samiti i radhës i nismës rajonale të Ballkanit të Hapur, i cili proklamohet si zgjatje e Procesit të Berlinit, e që këtë të fundit Scholz po tenton ta ringjallë.

Megjithatë për hulumtuesin e lartë dhe zëvendëskryetarin e organizatës jo-qeveritare, European Stability Initiative, Kristof Bender, as Procesi i Berlinit dhe as nisma rajonale Ballkani i Hapur, nuk do të mjaftonin për ta rikthyer tashmë besimin e humbur të Ballkanit Perëndimor karshi politikave të zgjerimit të BE-së.

“Nevojitet urgjentisht një angazhim më i fortë i Gjermanisë dhe anëtarëve të tjerë të BE-së për integrimin e vendeve të Ballkanit Perëndimor. Pasi procesi i anëtarësimit është dëmtuar nga rezistenca e vendeve anëtare të BE-së dhe nga bllokimet dypalëshe. Asnjë lider ballkanik për momentin nuk mund ta marrë seriozisht një gjë të tillë”, ka thënë Bender për Albanian Post.

E për ta ndryshuar këtë, sipas Bender, BE-ja duhet të zhvillojë një strategji të përkohshëm tërheqës, të besueshëm dhe të arritshëm – Anëtarësimin në tregun e brendshëm evropian.

Kristof Bender

“Tregu i brendshëm evropian mbulon shumicën e politikave të BE-së. Ai do t’i lejonte njerëzit të përfitonin nga BE-ja në jetën praktike. BE-ja duhet të ftojë të gjitha vendet që duan të anëtarësohen këtu, pavarësisht statusit të tyre formal në procesin e anëtarësimit, po ashtu edhe Kosovën. Pasi një vend arrin të plotësojë kriteret e tregut të brendshëm evropian, duke përfshirë respektimin e sundimit të ligjit, ai duhet të lejohet të anëtarësohet”, ka shtuar ai.

Sipas Bender, Tregu i brendshëm evropian nuk është një alternativë ndaj anëtarësimit pasi që çdo vend që i bashkohet BE-së duhet të anëtarësohet edhe këtu.

“Kur BE-ja nuk mundi të binte dakord për një perspektivë të plotë të anëtarësimit në fillim të viteve 1990, Austria, Finlanda dhe Suedia fillimisht u bënë anëtarë të Tregut Unik dhe vetëm më pas iu bashkuan BE-së si anëtarë të plotë. Duke pasur parasysh bllokimin e saj nga mosnjohësit, Kosova në veçanti do të përfitonte shumë nga një qasje e tillë”.

Olaf Scholz dhe Albin Kurti, më 4 maj në Berlin

Ndryshe më 4 maj, kancelari gjerman priti në takim kryeministrin e Kosovës, Albin Kurti, i cili për këtë të fundit ishte takimi i parë me Scholz, prej që ky i fundit zëvendësoi, muaj më parë, Angela Merkel.

Pas takimi kokë më kokë në të cilën mediat nuk ishin të pranishëm, në një konferencë për media, Scholz kishte theksuar se çështjet e hapura mes Kosovës dhe Serbisë duhet të zgjidhen hap pas hapi me idenë që të kulmojë në paqen dhe stabilitetin rajonal.

Mes tjerash Scholz, pati theksuar rëndësinë e bashkëpunimit dhe krijimit të një tregu të përbashkët rajonal brenda Procesit të Berlinit.

Vizita e Scholz në Kosovë po konsiderohet si një vizitë historike, pasi që pasardhësja e tij, Angela Merkel, gjatë udhëheqjes 16 vjeçare të republikës federale të Gjermanisë, qëndroi për vizitë zyrtare në Kosovë, vetëm një herë.

Gjatë turit dyditor në Ballkanin Perëndimor, Scholz pas Kosovës dhe Serbisë, do të shkojë edhe në Greqi, Maqedoninë e Veriut dhe Bullgari.

Ndërsa gjatë qëndrimit në Kosovë, Scholz, pritet të takohet vetëm me të parin e ekzekutivit, me të cilin do të mbajnë edhe një konferencë për media.

Përveç me të dhe vizitës që do t’u bëjë trupave gjermane që shërbejnë në kuadër të KFOR-it, takime të tjera në Prishtinë, deri të enjten, nuk janë parashikuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore