Lajme

Përjetësisht Kryetar


Albin Kurti

Partitë politike në Kosovë vazhdojnë krijimin e “njeriut superior”, atit themeltar, i cili nevojitet për të mbajtur shkëlqimin e grupit dhe u siguron pushtet finokëve që janë pjesë e tij.

Tërësia e pikëpamjeve, simboleve e vlerave që lidhen me autoritetin, bënë që kultura e këtyre organizimeve politike të përshkohet nga ideja se autoriteti si i tillë është diçka e mirë: e domosdoshme për mirëqenien e partisë dhe që meriton pareshtur nderim, përkulje, himne e ovacione.

Ky element – ndonëse në dozë më të vogël, mund ta gjejmë tek të gjitha partitë – më i theksuar është te funksionimi i Lëvizjes Vetëvendosje (LVV), e cila aktualisht ushtron pushtetin ekzekutiv në Kosovë.

Ilustrim

Partia lëvizje, sipas parimit një anëtar një votë, por pa kontestim publik apo konkurrim politik, ka shpallur zgjedhjet e brendshme për kryetar të partisë, në të cilat Albin Kurti s’ka kundërkandidat.

Njohësit e çështjeve politike, zgjedhjet e brendshme të LVV-së, të cilat priten ta nxjerrin sërish Kurtin si autoritet të pakontestueshëm brenda partisë, i shohin vetëm si formalitet, pasi askush në këtë parti nuk guxon ta sfidojë lidershipin e tij.

Politologu, Shkodran Ramadani, mendon se Kurti do t’i përdorë këto zgjedhje vetëm për të dërguar mesazh të qartë në anëtarësinë e LVV-së se emri i partisë është i ngjizur me emrin e tij.

“Këto zgjedhje po përdoren nga Albin Kurti si një mundësi për ta konsoliduar edhe më shumë autoritetin e vet brenda partisë dhe përpjekje për ta forcuar edhe më shumë kultin e liderit duke iu treguar të gjithëve se ai është një emër i cili nuk mund të ketë asnjë kundërkandidat”, tha ai në një prononcim për Albanian Post.

Duke parë problemet e brendshme gjatë zgjedhjeve të LVV-së që u shfaqën kohëve të fundit, ambicieve të pabalancuara në parti dhe rritjen e shpejtë të LVV-së, e cila në gjirin e saj ka përfshirë të gjitha rrymat e mendimit politik, sipas Ramadanit, është pikërisht arsyeja pse Kurti ka vendosur të kandidojë i vetëm.

Është neutralizimi i të gjithë zërave potencialë që mund t’i dalin kundër.

Në raportin e hiearkisë së plotë, gjasat që regjimi të jetë hegjemon janë të shumta. Në keto raste zor të flitet për kontestim publik, konkurrencë politike e aq më pak proces demokratik.

“Vetëvendosje është një parti e madhe, ka shumë heterogjenitet, ka edhe fraksione të ndryshme që tash po i shohim dhe si duket, Kurti duke e parë këtë realitet po mundohet që ta reduktojë këtë heterogjenitet dhe t’i vë edhe më shumë nën kontrollë të gjitha këto fraksione sikurse po e shohim fushatën e orkestruar për eliminimin e shumë eksponentëve të LVV-së, duke i përjashtuar ata nga mundësia që të garojnë në udhëheqje të degëve të VV-së në të gjitha anët e Kosovës”.

Në vitin 2019, para se të bëhej kryeministër, Kurti kishte ndryshuar edhe Statutin e Partisë, i cili atëherë nuk e lejonte t’i mbante të dy postet, pra edhe kryeministër edhe kryetar partie.

“Kryetari i Lëvizjes Vetëvendosje zgjidhet kryeministër, jep dorëheqje nga pozicioni i Kryetarit të Lëvizjes Vetëvendosje”, thuhej në pikën 73.3. të statutit.

Tash ndërkohë që statuti ia lejon një gjë të tillë, tamam u bë i qartë njëri nga elementet e totalitarizmit integral: në qoftë se udhëheqësi nuk bënë dot pa partinë e tij, as partia nuk bënë pa udhëheqësin e vet, e për këtë Ramadani thotë se ai e kishte bërë gati rrugën “të jetë përjetësisht kryetar i LVV-së”.

Shkodran Ramadani, politolog

Në fakt, në vitin 2015, për herë të parë në historinë e saj, LVV-së iu ndërrua udhëheqësi.

Zgjedhjet atëherë nxorrën kryetar, Visar Ymerin, gjithashtu pa kundër kandidat, i cili pas dy viteve dha dorëheqjen për arsye që tashmë dihen.

“Këtë proces e ka nisur qysh prej kohës kur ai ishte përplasur me anëtarët e partisë, tash të Partisë Social-Demokrate të cilët siç duket kanë pasur synim që vendimmarrjen në LVV ta shpërndajnë tek më shumë se një njeri, por Kurti ka qenë kundërshtar i këtij versioni dhe ka zgjedhur ta ndjek rrugën e partisë e cila është komplet në shërbim dhe e nënshtruar ndaj emrit të tij”, kujton Ramadani.

Se sa (jo)demokratik është një proces i tillë, për Albanian Post e shpjegon analisti dhe drejtori ekzekutiv i Organizatës për Demokraci “Çohu”, Arton Demhasaj.

Ai thekson se demokracia duhet të zhvillohet sëpari brenda partisë, nga proceset e brendshme, nga debati i brendshëm politik dhe si e tillë të bartet pastaj në nivelin qendror.

“Kur nuk kemi demokraci të mirëfilltë brenda partive politike atëherë nuk duhet të presim që ushtrimi i pushtetit nga njerëzit e njejtë, do ta zhvillojë demokracinë”, nënvizoi ai.

Sa i përket autoritetit që Kurti ka në parti, për Demhasajn, fatki që askush nuk guxon të dalë e ta sfidojë atë, tregon shumë për problematikën e çështjes.

“Lider i pakontestueshëm në LVV është Kurti, funksionimi dhe qeverisja është krijuar prej tij, është problem që dikush guxon t’i dal përballë”, u shpreh ai.

Sidoqoftë, ai vlerëson se në LVV ka njerëz që kanë potencial të marrin drejtimin e partisë, por sipas tij, ekziston frika se jo vetëm që nuk do arrijnë kurrë të prekin atë pozitë, por mund të përfundojnë jashtë skenës politike.

Arton Demhasaj, analist

“Normalisht, ka njerëz brenda LVV-së që e meritojnë dhe munden me qenë lider të partisë, por duke marrë parasysh mënyrën se si Kurti funksionon, mendoj që kushdo që mendon t’i dalë kundër, pas shumë pak kohësh përfundon jashtë skenës politike. Prandaj, edhe nuk ekziston guximi i brendshëm që dikush të dal si kandidat për kryetar partie”, sqaroi tutje ai dhe shtoi se problemi qëndron te të gjitha partitë kosovare, në të cilat gara zgjedhore bëhet sa për sy e faqe.

“Prandaj e shoh problematike, por kjo nuk është vetëm te LVV, por edhe te të gjitha partitë poltike, gara apo votimi që bëhet brenda partive politike është vetëm formale sepse e dimë se çka ndodhë pastaj”.

Sa i përket mbarëvajtjes së procesit zgjedhor në LVV, pakënaqësi ka pasur gjithandej – Ferizaj, Prizren, Lipjan e qytete të tjera ku të pakënaqurit kanë treguar se ose nuk u është pranuar kandidatura nga qendra, ose ka pasur mosdurim dhe mungesë tolerance për ata që s’i kanë shkuar përshtati krejtësisht partisë.

Mirëpo, Demhasaj nuk mendon se këto pakënaqësi mund të çojnë drejt ndarjes së dytë të partisë, por siç vlerëson, ai largime mundet të ketë.

“Nuk mendoj se LVV do të vijë para një ndarje të madhe përpos që mundet të largohet ndonjë individ i caktuar që janë të pakënaqur me procesin”.

Derisa ndonjë nga të pakënaqurit edhe mund të largohet, kryetari vazhdon të qëndrojë i njëjëti.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore