Euro 2024

Përfundon në barazim pjesa e parë mes Holandës dhe Anglisë


Ka përfunduar në barazim 1-1 pjesa e parë e ndeshjes Holandë – Angli, e vlefshme për gjysmëfinalet e Euro 2024.

“Signal Iduna Park” po pret ndeshjen e dytë gjysmëfinaliste të Euro 2024 mes Holandës dhe Anglisë. Skuadra fituese do i bashkohet Spanjës në finalen e 14 korrikut në Berlin.

Ishte një pjesë e parë e nisur mjaft mirë nga Holanda, por më pas “Tulipanët” duhej t’i nënshtroheshin forcës së “Tre Luanëve”, me këta të fundit që po bëjnë një nga paraqitjet më të mira në Euro 2024 në këto 45 minuta të para.

Xavi Simons realizoi golin e parë të sfidës në minutën e shtatë. Dhe, goli i tij është goli më i hershëm i shënuar në një gjysmëfinale të Euro-s që nga Alan Shearer për Anglinë kundër Gjermanisë në 1996 (minuta 3).

Por, pak minuta më vonë, Anglia do të fitonte 11 metërsh pas një ndërhyrje të gabuar të Denzel Dumfries ndaj Harry Kane.

Pas rishikimit të rastit në VAR nga gjyqtari kryesor i takimit, Felix Zwayer, Anglia fitoi 11 metërsh të cilin në minutën e 17 e ktheu në gol kapiteni Kane.

Harry Kane është tani golashënuesi më i mirë i të gjitha kohërave në ndeshjet me eliminim direkt në Kampionatin Evropian, me penalltinë e tij kundër Holandës për golin e tij të gjashtë të tillë.

Kapiteni i Anglisë gjithashtu tani ka më shumë gola në fazën eliminatore në turnetë e mëdha (Kupa e Botës/Euro) se çdo lojtar tjetër evropian (9), duke kaluar Gerd Muller, Miroslav Klose, Antoine Griezmann dhe Kylian Mbappe (të gjithë 8).

Vetë Dumfries do të shlyente gabimin pasi në minutën e 26 hoqi mbi vijën fatale një top i cili ishte drejtuar për në fundin e rrjetës së portës së mbrojtur nga Bart Verbruggen.

Dhe nuk ishte vetëm kaq. Mbrojtësi i Inter-it rrezikoi portën angleze pak minuta më vonë duke gjetur traversën pas një goditjeje me kokë.

Megjithatë, me disa raste shënimi dhe nga një gol për secilin ekip u mbyll pjesa e parë në barazim 1-1.

Tani mbeten edhe 45 minuta, ose edhe më shumë nëse ndeshja përfundon në barazim në kohën e rregullt. Penalltitë janë gjithashtu një opsion i mundshëm.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore