Përfundon mbledhja në selinë blu, Berisha: Basha deputet, Yuri Kim guvernatore

Mes tensionesh ka përfunduar mbledhja e ish-liderit të Partisë Demokratike, Sali Berisha, bashkë me Komisionin e Përkohshëm – të dalë nga Kuvendi i thirrur nga vetë ai më 11 dhjetor – në selinë blu.

Nga aty, Berisha është shprehur se kryetari i PD-së, Lulzim Basha, është “thjesht një deputet dhe anëtar i grupit parlamentar”.

Ai ka cilësuar këtë konferencë si “më të veçantën” e të gjithave.

Ndër të tjera, ish-kryeministri shqiptar ka shtuar se, “pas themelimit të PD-së, ky ishte Kuvend më perëndimor me vlerat që sanksionoi në kushtetutën e PD-së”.

Kjo mbledhje, sipas tij, është përqendruar në organizimin e referendumit të thirrur më 18 dhjetor.

Ai tha se është miratuar një referendum, për ratifikimin e Kuvendit të 11 dhjetorit.

Sa i përket vendimit të PD-së për të kallëzuar në Prokurorinë e Posaçme (SPAK) disa deputetë demokratë – që ishin pjesë e Kuvendit Kombëtar të mbledhur nga ish-kryeministri duke i akuzuar për falsifikim të vulave, stampave ose i formularëve – Berisha e ka krahasuar me një “akt të poshtër dhe tradhtar”.

I pyetur nëse kandidatura e tij për kryetar të PD-së bie ndesh me vlerat demokratike, Berisha theksoi se “shpallja non grata është një çështje personale e imja”.

Ish-kryeministri ka akuzuar sërish ambasadoren e SHBA-ve në Shqipëri, Yuri Kim, duke e cilësuar si një guvernatore.

Sipas tij, është shkelje flagrante që dikush të përcaktojë se kush hyn apo jo në Parlament.

Sakaq, Basha vijon mbledhjen e tij me anëtarët e PD-së.

Në mbledhjen e këtij të fundit janë të pranishëm sekretari i Përgjithshëm i partisë, Gazment Bardhi, dhe kryetari i Komisionit Zgjedhor, Jemin Gjana.

Ndërkohë, mbështetës të të dyja palëve e kanë agravuar situatën duke u përplasur me njëri-tjetrin.

Pas futjes në ambientet e shtëpisë së PD-së, nuk munguan as akuzat për Lulzim Bashën.

Berisha e akuzoi atë për “marrjen e karrigeve”.

“Çmenduria e Bashës, ka marrë të gjitha karriget”, u shpreh ish-kryeministri i Shqipërisë.

Ky i fundit theksoi se, vendimet, që do të merren pas mbledhjes, do të bëhen publike edhe për mediat.

Berisha i ka bërë thirrje Bashës që deri më “18 dhjetor të mendojë dhe të reflektojë për vendimin e Kuvendit”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.