Përfaqësia e FRPD-së: Situatë e turpshme – ne nuk përbëjmë rrezik

Një grup përfaqësie e Forumit Rinor të Partisë Demokratike (FRPD), kanë komunikuar për mediat duke e konsideruar mbylljen e selisë blu, sipas tyre, një situatë të turpshme.

Ata kishin mbërritur në ambientet e Partisë Demokratike për të zhvilluar një mbledhje.

Fillimisht njëri prej anëtarëve është shprehur se “mbyllja e derës për të rinjtë është një situatë e paprecedentë”.

Të pyetur nga mediat lidhur me njoftimin për hyrjen të rinjtë kanë deklaruar njëzëri se “kanë hyrjen e tyre”.

“Ne nuk përbëjmë rrezik”, ka nënvizuar njëri prej të rinjve.

Për një anëtare tjetër të FRPD-së “t’i mbyllësh derën të rinjve, do të thotë t’i mbyllësh derën të ardhmes”.

Gjatë fjalës së saj, ajo kujtoi edhe heqjen e simboleve nga hyrja e FRPD-së.

“Selia është e jona, e të gjithë demokratëve”, bëri thirrje një i ri teksa ftoi të gjithë mbështetësit që t’i bashkohen protestës kombëtare të lajmëruar nga ish-lideri demokrat Sali Berisha, më 8 janar.

Në përmbyllje, të rinjtë stampuan disa posterë në dyert e selisë blu.

“Parti e Rinisë dhe jo Burg i Sigurisë së Lartë” apo “Jo pronë e pengut por seli e demokratëve”, ishin thirrjet e stampuara të përfaqësisë së FRPD-së.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.