Përafrimi me politikën e jashtme të BE-së në Ballkanin Perëndimor: Serbia në 47%, vendet e tjera 100%

Nga 1 janari 2024 deri më 30 qershor 2024 – Shqipëria ka përafruar 100% politikën e jashtme me atë të Bashkimit Evropian.

Ndryshe, Serbia e ka përshtatur me vetëm 47%, ndërsa vendet e tjera kandidate në rajon –Bosnja dhe Hercegovina, Mali i Zi dhe Maqedonia e Veriut – janë të përafruara me 100% njëjtë si Shqipëria.

Këto janë rezultatet e analizës së Qendrës për Çështje Ndërkombëtare dhe Sigurisë (ISAC Fund), të publikuar më 18 shtator.

“Serbia ka vazhduar modelet e saj të përafrimit me Politikën e Përbashkët të Jashtme dhe të Sigurisë (CFSP) në vitin 2024, ngjashëm me 2022 dhe 2023, kur ajo kishte norma të përafrimit prej 48 për qind dhe 54 për qind, respektivisht”, thuhet në analizën e ISAC.

Nga 1 janari 2024 deri më 30 qershor 2024, BE-ja ka lëshuar 57 deklarata, duke u bërë thirrje vendeve kandidate dhe partnere që të bashkohen. Serbia u rreshtua me 27 deklarata dhe masat pasuese por nuk arriti të përafrohet me 30, tregon analiza.

Si më parë, Serbia i është shmangur rreshtimit me deklaratat dhe masat e drejtuara kundër Federatës Ruse dhe Republikës Popullore të Kinës, shtetasve, subjekteve apo interesave të tyre.

“Një nga arsyet kryesore për këtë qëndrim mbetet çështja e Kosovës, pasi Serbia vazhdon të kërkojë mbështetjen e Rusisë dhe Kinës në forume të ndryshme ndërkombëtare”, vlerëson ISAC.

Nga ana tjetër, Serbia u rreshtua me masat kufizuese të zbatuara në lidhje me ISIS/Al-Kaedën, terrorizmin, Sirinë dhe Birmaninë/Myanmar.

Kur bëhet fjalë për vendet e tjera kandidate për në BE, Ukraina ishte në 93% të shtrirjes në gjysmën e parë të 2024, ndërsa Moldavia ishte në 86%. Përafrimi i Gjeorgjisë me politikën e jashtme të BE-së ishte 44%, dhe përafrimi i Turqisë ishte vetëm 7%, ka treguar analiza e ISAC.

Marrë nga European Western Balkan, përshtatur për Albanian Post

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.