“Për shpëtim të Kosovës” – s’përjashtohet mundësia e një koalicioni PDK-LVV

Deputetja e Partisë Demokratike të Kosovës, Ariana Musliu-Shoshi, ka thënë se kjo parti nuk ka “vija të kuqe” me asnjë partie shqiptare, as Lëvizjen Vetëvendosje për ndonjë koalicion të mundshëm.

“Ne kemi thënë se jemi e vetmja parti e cila asnjëherë në asnjë palë zgjedhje nuk ka pas vija të kuqe me asnjë parti shqiptare. Prandaj është ende shumë herët të diskutohet për një çështje të tillë”, tha ajo në një intervistë për Ekonomia Online.

“Prapë se prapë ne si PDK i kemi organet tona, është Kryesia, është Këshilli Drejtues që paraprakisht e diskutojmë, marrim mendimin dhe opinionin, votën e secilit ashtu siç mendon dhe varësisht nga opinionet e ndryshme, vendimet merren në shumicë e nuk merren vendimet me individë”, shtoi ajo.

Një natë më parë edhe deputeti tjetër i PDK-së, Hisen Berisha, ka theksuar se nuk e përjashton mundësinë e koalicionit me LVV-në, siç ka thënë ai “për shpëtim të Kosovës”.

“Mundet krahas Kosovës të përfitojë e shpëtojë edhe Albini në këtë proces politik që është fundi i tij politik ku e ka çu Kosovën”, ka thënë Hyseni i cili ku është pyetur nëse PDK-ja do t’ia japë këtë mundësi shpëtimi Albin Kurtit, është përgjigjur se “ne do t’ia japim Kosovës këtë shpëtim, nëse përfiton ai në shpëtim të Kosovës le të shpëton”.

Më 13 maj edhe kryetarja e partisë “Guxo”, Donika Gërvalla, njëherit ministre e Punëve të Jashtme, nuk e ka përjashtuar një koalicion të mundshëm me Partinë Demokratike të Kosovës nëse mbahet zgjedhjet e jashtëzakonshme parlamentare, por sipas saj, kjo parti fillimisht do duhej t’i largonte “figurat e lidhura me krim dhe korrupsionin”.

“PDK-ja për aleatët ndërkombëtarë ka qenë sinonim i korrupsionit dhe krimit të organizuar. Unë nuk mendoj që ka për të ndodhur. Të flasim për realitetin. Në rastin ekstrem që nuk pres të ndodh në mandatin e ardhshëm, nëse PDK apo cila do parti do të ishte ndarë nga njerëz që përfaqësojnë krimin dhe korrupsionin, unë nuk do shihja asnjë pengesë”, ka potencuar Gërvalla.

Ndryshe kryeministri Albin Kurti më 13 maj është takuar edhe me kryetarin e Partisë Demokratike të Kosovës, Memli Krasniqin, derisa mbajtja e zgjedhjet të parakohshme parlamentare, doli të jetë tema kryesore e “darkës së punës” mes Kurtit dhe Krasniqit, për çka edhe pati një lloj “dakordance”, por siç u tha pas takimit për datën dhe kohën duhet koordinim edhe me partitë e tjera.

Ndërkaq Lidhja Demokratike e Kosovës dhe Aleanca për Ardhmërinë e Kosovës e patën refuzuar ftesën e Kurtit. LDK-ja nëpërmjet një komunikate për media ka thënë se dorëheqja e Kurtit duhet t’i paraprijë shpërbërjes së Kuvendit të Kosovës, në mënyrë që t’u hapet rruga zgjedhjeve të jashtëzakonshme parlamentare në Kosovë.

Të njëjtin pozicion e ka elaboruar edhe AAK-ja .Sipas saj, vetëm me dorëheqjen e kryeministrit Kurti mund të shkohet në zgjedhje të parakohshme.

Përkundër që partitë politike shprehën sërish gatishmëri për zgjedhje të parakohshme parlamentare, akoma nuk ekziston një konsensus në mesin e subjekteve opozitare për thirrjen e një seance të posaçme për shpërndarjen e Kuvendit të Kosovës, derisa pushteti u fsheh pas thirrjes për unitet brenda opozitës në mënyrë që t’u hapet rruga zgjedhjeve të jashtëzakonshme.

Partitë veçse kanë nisur të mobilizohen për shkak të mundësisë së zgjedhjeve të reja pak para përfundimit të mandatit të qeverisë së drejtuar nga LVV-ja – mandati katërvjeçar i ekzekutivit aktual përfundon në shkurt të vitit 2025 – ndërkohë që për shkak të zhvillimeve aktuale, mundësia e zgjedhjeve të jashtëzakonshme përgjatë këtij viti nuk mund përjashtohet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.