![](https://albanianpost.com/wp-content/uploads/2024/07/FotoJet-57.jpg)
Në një adresim para qytetarëve në mbledhjen e Qeverisë, kryeministri Albin Kurti, ndonëse institucionet nuk morën përgjegjësi për arratisjen nga burgu të Faton Hajrizit i cili u vra në Serbi, bëri thirrje që ky i fundit të mos heroizohet.
Kurti tha se qytetarët të mos bien pre e “euforisë së heroizimit” dhe romanizimit të Hajrizit, meqë sipas kryeqeveritarit kosovar, patriot në Kosovë është rreshteri Afrim Bunjaku, që u vra në Banjë të Zveçanit, e jo Hajrizi.
Por, dy vite më parë, Kurti e kishte ngritur në piedestal politikanin serb, udhëheqësin dhe themeluesin e organizatës terroriste-kriminale “Rojat e Urës” së Ibrit, Oliver Ivanoviçin, që është vrarë më 16 janar të vitit 2018 në Mitrovicë të Veriut.
Akuzat për krime lufte me të cilat përballej Ivanoviç ishin “mbuluar” në një përkujtim që kryeministri Kurti që ia kishte kushtuar ish-politikanit serb në pesë-vjetorin e vrasjes së tij.
“Ivanoviç ishte një person i përkushtuar për të luftuar për interesat e komunitetit dhe qytetit të tij. Ai e bëri këtë duke qenë i hapur, i sinqertë, gjithmonë i mprehtë në çështjet me rëndësi, por edhe i respektueshëm edhe ndaj atyre me të cilët nuk ishte dakord”, thoshte Kurti për Ivanoviçin që kishte dëbuar shqiptarët.
Madje kërkonte që autorët e vrasjes së politikanit nga Veriu të dalin para drejtësisë, duke potencuar se eliminimi e tij ndikoi në gjithë shoqërinë, por edhe pluralizmin politik te serbët.
“Në këtë mënyrë të gjithë do ta ruajmë kujtimin e Oliver Ivanoviçit.”, pati thënë Kurti në video-adresimin për Ivanoviçin.
“Oliver Ivanoviç ishte një person i përkushtuar për të luftuar për interesat e komunitetit dhe qytetit të tij. Ai e bëri këtë duke qenë i hapur, i sinqertë, gjithmonë i mprehtë në çështjet me rëndësi, por edhe i respektueshëm edhe ndaj atyre me të cilët nuk ishte dakord”, potenconte kryeministri.
Kurti thoshte se dëshironte që Ivanoviç të kujtohej si “një njeri që punoi për një të ardhme të qëndrueshme dhe për një Kosovë shumetnike”.
Por, qëndrimi pozitiv i Kurtit në pushtet në raport me figurën e Ivanoviçit paraqiste një ndryshim rrënjësor nga vlerësimi me atë të Kurtit si opozitar.
Gjatë vitit 2015, atëkohë si kryetari i Lëvizjes Vetëvendosje, pati thënë se i ndjeri ishte angazhuar “për realizimin e planit hegjemon të Serbisë – kolonizimin e Kosovës”.
Ndërkaq i gjendur në thumbin e kritikave, sivjet Kurti ka shkruar përsëri për rastin e vrasjes së Oliver Ivanoviç, por nuk ka thurur llavde për të, veçse ka theksuar se si Ivanoviç ka qenë aktiv gjatë viteve të luftës 98-99 dhe deri në shkurt të vitit 2000 për dëbimin e shqiptarëve nga Veriu.
“Oliver Ivanoviç ishte aktiv gjatë të dyjave: luftës ’98-‘99 dhe dëbimit të shkurtit 2000 të mijëra shqiptarëve nga veriu. Beogradi i frikësohej atij si dëshmitar të mundshëm të EULEX-it. Sot, 6 vjet pas vrasjes së tij në Mitrovicën e Veriut, vrasësit e tij ende enden të lirë në Serbi”, pati shkruar ai në platformën X.
Oliver Ivanoviç ishte vrarë më 16 janarit të 2018-s. I ndjeri ishte bartës i listës “Liria, Demokracia, Drejtësia – Oliver Ivanoviç” në zgjedhjet lokale të cilat u mbajtën në nëntor të vitit 2017, pak muaj para vrasjes së tij.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com