Alar Karis do të jetë i pari president i Estonisë, i cili pritet të vizitojë Shqipërinë mes 7 dhe 9 qershorit, me ftesë nga Presidenti i Republikës, Bajram Begaj.
Sipas një njoftimi zyrtar nga zyra për shtyp e Presidencës, Karis do jetë në Tiranë për një agjendë të ngjeshur, ku përtej takimeve dypalëshe me Begajn, do të ketë edhe aktivitete që përfshijnë rajonin.
Sipas agjendës së vizitës, pas ceremonive të mirëseardhjes, që do të zhvillohen më 7 qershor 2023, ora15:00, në Institucionin e Presidentit të Republikës, të dy krerët e shteteve do të zhvillojnë një takim kokë më kokë e më pas do të kryesojnë delegacionet zyrtare në një takim të zgjeruar.
Në fund të takimeve, të dy Presidentët do të kenë dhe një dalje të përbashkët për mediat.
Në qendër të bisedimeve do të jenë nevoja e nxitjes së mëtejshme të marrëdhënieve dypalëshe, veçanërisht në çështjet e bashkëpunimit ekonomik dhe qeverisjes elektronike, por edhe zhvillimet në rajonin e Ballkanit Perëndimor, integrimi evropian i Shqipërisë dhe i vendeve të këtij rajoni, si dhe ndikimi i agresionit ushtarak rus në Ukrainë, për Estoninë dhe rajonin e vendeve Baltike por edhe të Ballkanit Perëndimor.
Më 9 qershor, të dy Presidentët do të ndjekin një stërvitje të përbashkët kibernetike të ekspertëve nga Estonia, Shqipëria, Mali i Zi dhe Maqedonia e Veriut.
Takime të tjera, presidenti estonez do t’i ketë edhe me autoritete të tjera të larta shqiptare, si edhe pritet që ai të zhvillojë një vizitë në qytetin e Beratit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
