Për herë të parë një raport dëshmon masakrën e Bashar al-Assadit në Daraya të Sirisë

Dhuna e pajustifikuar dhe e papritur e kryer nga forcat Qeveritare siriane kundër civilëve në qytetin e Daraya-s 10 vite më parë është zbuluar në hetimin e parë në lidhje me këtë masakër.

Të paktën 700 njerëz u vranë kur forcat besnike të presidentit, Bashar al-Assad sulmuan qytetin midis 24 dhe 26 gushtit 2012.

Trupat shkuan derë më derë duke vrarë dhe arrestuar burra, gra dhe fëmijë.

Për të shënuar 10 vjetorin e mizorisë, një ekip hetuesish nga Siria, të mbështetur nga grupi mbrojtës i Konsorciumit Britanik Sirian (SBC), gjurmuan të mbijetuarit dhe dëshmitarët e shpërndarë nëpër botë.

Kjo për të regjistruar dhe analizuar dëshmitë e tyre.

Emrat e disa hetuesve janë ndryshuar për arsye sigurie.

Ekipi shpreson se gjetjet, të publikuara të enjten e 25 gushtit, do të përdoren nga organet e OKB-së dhe institucione të tjera ligjore për të ndjekur penalisht disa nga ata që janë përgjegjës.

Asokohe ngjarjet në Daraya, disa milje larg Damaskut, u konsideruan si masakra më e keqe e luftës civile.

Regjimi i Asadit e përshkroi atë si një operacion kundër terrorizmit.

Ndërkombëtarisht, ai ka mbetur kryesisht i padokumentuar, përveç një përmendjeje të shkurtër në një raport më të gjerë të OKB-së për Sirinë në 2013, i cili pranoi se forcat qeveritare kryen krime lufte.

Hetuesja, Yafa Omar, e cila kujton se bombardimet e dëgjuara nga shtëpia e saj në qendër të Damaskut, deklaroi se lejimi i këtyre krimeve në Siri do të kthehej në një normë dhe do të ndodhte diku tjetër.

Në ditët para masakrës, dëshmitarët, shumë prej të cilëve po intervistoheshin për ngjarjet për herë të parë, thanë se qeveria e Asadit dhe aleatët e saj granatuan pa dallim lagjet nëpër Daraya, duke vrarë dhe plagosur civilë.

“Përshkallëzimi i regjimit kundër qytetit të Daraya-s filloi në ditën e parë ose të dytë të Bajramit (19 ose 20 gusht). Bombardimet u bënë më keq se normalja. Pati granatime me mortaja dhe lloje më të këqija bombardimesh me armë që ne nuk i njihnim”, tha një prej dëshmitarëve.

Ai shtoi se skena pas sulmit ishte “e tmerrshme, e ngjashme me ditën e gjykimit”.

Raporti shkruante se hetuesit ishin në gjendje të identifikonin forcat qeveritare dhe milicitë iraniane të Hezbollahut të përfshirë në sulme.

Ekipi gjithashtu identifikoi disa persona përgjegjës.

“Përpjekjet për të mjegulluar faktet e asaj që ndodhi ishin pothuajse më keq se vetë masakra”, tha hetuesi Ahmed Saied, i cili u rrit në Daraya.

Saied shtoi se dokumentimi i krimeve që ndodhën në qytetin e tij ishte i vështirë, por jo i pamundur.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.