Peleshi: Baza Ajrore Kuçovë, bazë për Naton

Punimet për rindërtimin e Bazës Ajrore të Kuçovës pritet të nisin në muajin tetor të vitit 2021”. Lajmin e ka bërë të ditur Ministri i Mbrojtjes, Niko Peleshi, përmes një postimi në median sociale “Facebook”.

Ministri Peleshi e cilësoi investimin në këtë bazë shumë të rëndësishëm për vendin tonë.

“Është një projekt shumë i rëndësishëm, në mos më i rëndësishmi i këtyre viteve të fundit, sepse, jo vetëm që na jep një infrastrukturë dhe kapacitete të modernizuara në hartën e Aleancës sonë, por rrit edhe peshën strategjike të vendit tonë në rajon dhe më gjerë. Jemi të gjithë të angazhuar dhe në kohë me kalendarin tonë, si me shpronësimet si me ato pjesë të punimeve që i kemi marrë përsipër t’i kryejmë, që nga rrethimi i bazës, rrugët e brendshme, furnizimi me energji elektrike dhe ujë, të cilat janë pjesë e investimit të palës sonë. Kontributi i palës shqiptare shkon në rreth 10% të vlerës së përgjithshme të investimit në këtë bazë, e cila me investimin e NATO-s do të kthehet në një bazë taktike të dislokueshme”, tha Peleshi.

Ai sht0i se punimet synohet të nisin në vjeshtë të këtij viti.

“Tani jemi në fazën e procedurave të prokurimit nga Agjencia e Prokurimit e NATO-s. Në fund të marsit pritet të lidhen kontratat me kontraktorët. Ka shumë të interesuar, kontraktorë vendas dhe të huaj, që do të operojnë për të zbatuar projektet. Në planin tonë kalendarik të punimeve në këtë bazë parashikohet që nga muaji tetor-nëntor të nisnin punimet. Ato do të zgjasin deri në fund të vitit 2023”, u shpreh Peleshi.

Investimi prej rreth 50 milionë eurosh, pesë prej të cilave nga buxheti i shtetit, konsiston në ndërtimin e depove të armatimit dhe të karburantit, stacioneve të armatimit, parkingut të avionëve, stacionit kundër avarive dhe zjarreve, rindërtimin e pistës dhe kullës së kontrollit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.