Shqipëria

Peleshi: Banorëve që u preket prona nga baza ushtarake e NATO-s, dëmshpërblim


Ministri i Mbrojtjes në Republikën e Shqipërisë, Niko Peleshi, ka reaguar pas protestës së banorëve të Moravës.

Këta të fundit kanë kërkuar dëmshpërblim për pronat e tyre që preken nga ndërtimi i bazës ushtarake të NATO-s në Kuçovë.

Peleshi ka deklaruar se kjo do të kryhet sipas ligjit me vlerën e tregut.

Sipas tij, do të përfitojnë vetëm ata banorë, të cilëve iu preken pronat.

Ai vuri në dukje se shteti shqiptar nuk e ka mundësinë dhe të drejtën që të veprojnë në shkelje të ligjit.

Peleshi, edhe një herë vuri në dukje se ky do të jetë një investim strategjik, që do të thotë më shumë ekonomi për zonën, ndërsa e konsideroi ngritjen e bazës ajrore të NATO-s si historike për vendin.

Të enjten e 9 dhjetorit ministri njoftoi se është firmosur nisja e punimeve për bazën ajrore të Kuçovës.

Peleshi e ka cilësuar këtë si projektin më madhor në fushën e zhvillimit infrastrukturor.

Sipas tij, ky vendim ka sjellë lajme të mira edhe për familjet që preken nga shpronësimi, duke u siguruar atyre se, do të marrin vlerën më të mirë të tregut.

Por, gjithashtu, kjo për Peleshin tregon edhe një pikë të fortë të Shqipërisë, e denjë për të qenë aleate e NATO-s.

“Ky është një zhvillim, mbi 50 milionë euro investim, punësim për të gjithë zonën përreth”, tha ai.

Investimi konsiston në ndërtimin e depove të armatimit dhe të karburantit, stacioneve të armatimit, parkingut të avionëve, stacionit kundër avarive dhe zjarreve, rindërtimin e pistës dhe kullës së kontrollit.

Kontributi i palës shqiptare shkon në rreth 10% të vlerës së përgjithshme të investimit në këtë bazë, e cila me investimin e NATO-s do të kthehet në një bazë taktike të dislokueshme.

/Albanianpost.com


Lajmet kryesore