Peci e Gërvalla i punësojnë asistentët e vet si zyrtarë të lartë nëpër ministri

Donika Gërvalla, Ministrja e Punëve të Jashtme dhe Faton Peci, Ministër i Bujqësisë, të dy këta bashkëkryetar të Partisë Guxo, kanë punësuar asistentët e tyre nëpër dikasteret që drejtojnë.

Haki Huruglica ka qenë asistent administrativ i Gërvallës, ndërsa i njëjti më 15 korrik, është zgjedhur Zyrtar i Lartë për Koordinim të Politikave, në Departamentin e Integrimit Evropian dhe Koordinim të Politikave.

Sipas vendimit për pranimin e Huruglicës, që është marrë nga Ministria e Bujqësisë, Pylltarisë dhe Zhvillimit Rural – Njësia për Menaxhimin e Burimeve Njerëzore, ish-asistenti i Gërvallës ka marrë 58.4 pikë në testin me shkrim, ndërsa 23.6 në intervistën me gojë dhe 82 në total.

Verona Menxhiqi më 6 prill 2021, ishte emëruar asistente ekzekutive e Ministrit Peci nga vetë Peci.

Ndërsa, më 16 korrik 2024, tri vjet më vonë, ajo është emëruar Zyrtare e Lartë Ligjore Departamentin Ligjor të Ministrisë që drejtohet nga Peci.

Sipas vendimit të përzgjedhjes së Menxhiqit, ajo ka marrë 64 pikë në testin me shkrim, 26.6 në intervistën me gojë, ndërsa totali është 90.6.

Ky nuk është rasti i vetëm kur në ministritë që drejtohen nga eksponentët e Guxo-s shpërfaqet nepotizmi.

Më 15 janar, Albanian Post kishte raportuar se si Gërvalla e kishte punësuar Donat Krasniqin si këshilltar të Jashtëm.

Donati, miku i vëllait të ministres, apo vëllai i gruas së vëllait, ishte punësuar në kabinetin e ministres si këshilltar politik i jashtëm.

Ai kurrë nuk kishte shkuar në punë. Donati me profesion është muzikant dhe s’ka lidhje as me politika as me të jashtme.

Siç i kishin treguar Albanian Post-it burime nga brenda MPJ-së, Donati nuk ishte punësuar që të jap këshilla politike, meqë as nuk merret me politik, por për arsye krejt tjera.

Si muzikant, Donati kishte nevojë të udhëtojë për në Shtetet e Bashkuara të Amerikës, ku jeton edhe vëllai i tij. Me statusin e punonjësit të MPJ-së dhe pjesë e kabinetit të ministres, ai mund të pajisej me vizë amerikane lehtësisht me rekomandimin e ministrisë.

Kjo ishte edhe arsyeja përse Donati fillimisht u punësua.

Albanian Post kishte pyetur MPJ-në për këtë shkelje, por ishte refuzuar të kthehej një përgjigje prapa.

Donika Gërvalla e punëson familjarin e vet si këshilltar politik, i cili me profesion është muzikant

Ndërsa, më 8 korrik të vitit 2022, mediumi online “Demokracia” pati publikuar një dokument që tregonte se si Gërvalla i kishte mundësuar vajzës së vet Nora Schwarz të siguroi certifikatë nga ministria.

Asaj i duhej për arsye të shkollimit të saj në Gjermani dhe Gërvalla ia kishte mundësuar.

Certifikata sugjeronte se Nora Schwarz ka përfunduar një praktikë në ministri, gjë që doli të mos jetë e vërtetë.

Praktika nuk u krye kurrë, por certifikata u morë.

Gërvalla s’e kishte mohuar dokumentin e publikuar e as lajmin, përveç se kishte akuzuar mediat që po merren me të.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.