PDK: S’do të ndalemi deri sa të sqarohet gjithçka për rastin “Dehari”

Shefi i grupit parlamentar të Partisë Demokratike të Kosovës, Abelard Tahiri, ka reaguar sërish për heshtjen e Lëvizjes Vetëvendosje (LVV) për gjetjen e mostrave të Astrit Deharit për të cilat raportoi Albanian Post më 8 dhjetor.

Tahiri, përmes një shkrimi në rrjetin social ‘Facebook’ ka potencuar se s’do të ndalen deri sa të sqarohet gjithçka.

“Çka është kjo heshtje në Vetëvendosje për mostrat e rastit Dehari?”.

“Kush i vodhi mostrat e rastit Dehari? Ku qëndruan ato për një vit e gjysmë? Për çka shërbyen ato mostra jashtë Institutit? A pati ndërhyrje në mostra në kohën sa ishin jashtë Institutit? Kush i ktheu ato? Pse nuk pranuat ta votoni komisionin hetimor parlamentar për zhdukjen e këtyre mostrave? Nuk mund të fshiheni nga e vërteta! Ne nuk do të ndalemi deri të sqarohet gjithçka!”, ka thënë ai.

Edhe të dielën pas raportimit të Albanian Post se janë gjetur mostrat e ish aktivistit të Lëvizjes Vetëvendosje, Astrit Deharit që ishin zhdukur gjatë vitit 2022, shefi i Grupit Parlamentar të Partisë Demokratike të Kosovës, Abelard Tahiri, i ka bërë thirrje Prokurorisë Speciale që të vihet para drejtësisë

Ssecili zyrtar shtetëror që ka gisht në zhdukjen e provave të Deharit dhe në kthimin e pjesshëm të tyre”.

“Këto tri vjetët e fundit, nën pushtetit e Albin Kurtit, u vështirësua dhe u mjegullua padrejtësisht dhe në mënyrë misterioze. Zhdukja e mostrave, gjetja e pjesshme apo e plotë e tyre, për secilin rast, është përgjegjësi e institucioneve shtetërore dhe nuk mund të tejkalohet me lehtësi sikur nuk ka ndodhur asgjë”, tha Tahiri në një konferencë për media.

Deputeti i PDK-së ka kërkuar nga Prokuroria që të marrë hapa të menjëhershëm për të vënë para drejtësisë përgjegjësit, derisa ka shtuar se në dhjetor të vitit 2022, u publikua lajmi për zhdukjen e mostrave të Astrit Deharit dhe askush nuk dha përgjegjësi politike që në zyrat shtetërore u zhduken mostrat e këtij rasti.

Më 8 dhjetor të 2022-së, Institutit të Mjekësisë Ligjore (IML), i ishin zhdukur mostrat e ish aktivistit të Lëvizjes Vetëvendosje, Astrit Dehari, por pas pothuajse një viti e gjysmë mostrat e ish aktivistit të Lëvizjes Vetëvendosje, Astrit Dehari, janë gjetur dhe janë kompletuar.

Në një konferencë për media më 8 dhjetor të 2022-së, ministrja e Drejtësisë, Albulena Haxhiu, kishte bërë të ditur se ishin zhdukur mostrat e Astrit Deharit – aktivistit të Lëvizjes Vetëvendosje.

Gjenden të gjitha mostrat e Astrit Deharit – s’dihet kush i mori e s’dihet kush i ktheu

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.