PDK-ja takon Hasanin: Raportet Kosovë – Shqipëri më të thella sesa kokëçarjet e shkaktuara nga liderët e përkohshëm

Nënkryetarja e Partisë Demokratike të Kosovës, Vlora Çitaku, këtë të marte ka pritur në selinë e PDK-së ministrin e Punëve të Jashtme të Shqipërisë, Igli Hasani, i cili po qëndron në Kosovë për vizitë zyrtare.

Ndërsa në takim janë diskutuar raportet me Kosovës dhe Shqipërisë, Çitaku, citohet të ketë thënë se raportet mes dy vendeve janë më të thella se kokëçarjet e shkaktuara nga liderët e përkohshëm duke aluduar për kryeministrin e Kosovës, Albin Kurtin dhe atë të Shqipërisë, Edi Rama.

Komunikata për media e lëshuar nga PDK-ja bënë të ditur se në takim në mes të Çitakut dhe kryediplomatit shqiptar ndër të tjera është diskutuar edhe gjendja aktuale politike në vend dhe fuqizimin e marrëdhënieve vëllazërore mes dy shteteve.

“Shqipëria nuk është një fqinj i rëndomtë i Kosovës, dhe raportet mes Kosovës dhe Shqipërisë janë më të thella e shumëfish më të fuqishme se kokëçarjet e shkaktuara nga liderët e përkohshëm”, ka thënë Çitaku njofton komunikata.

Hasani në anën tjetër, siç kumton komunikata ka theksuar se anëtarësimi i Kosovës në NATO është një nga prioritetet e kryesisë shqiptare të Kartës SHBA – Adriatike përgjatë vitit 2024.

Hasani ndër të tjera është zotuar se Shqipëria do të vazhdojë mbështesë Kosovën në rrugën e saj drejt integrimit në Bashkimin Evropian dhe anëtarësimit në organizata rajonale e ndërkombëtare.

“Shqipëria është dhe do të vazhdojë të jetë një mbështetëse e fuqishme e politikës së dyerve të hapura”, ka thënë Hasani.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.