![](https://albanianpost.com/wp-content/uploads/2023/04/Screenshot-2023-04-15-105752.png)
Kryeministri i Shqipërisë, Edi Rama, deklaroi se Partia Demokratike nuk ka mundur të krijojë një shembull të mirëqeverisjes vendore gjatë 30 viteve të fundit.
“Në 30 vjet qëkur ka zgjedhje demokratike vendore në Shqipëri, nuk kanë mundur të krijojnë një shembull të vetëm që dinë të kujdesen për një bashki, për një qytet, për një fshat”, theksoi fillimisht kreu i Qeverisë.
Lajmi u bë i ditur gjatë çeljes së fushatës së Socialistëve në Kavajë.
“Më kujtohet që kur Kavaja (bashkia – ed.) u kthye në duart e tyre të vetmet probleme që patëm ne me Kavajën nuk ishin më si të financojmë ndonjë projekt më shumë, si të bëjmë një kopsht më shumë, si të bëjmë një shkollë më shumë, si të hapim një tjetër hapësirë të gjelbër, si të kemi edhe më shumë pastërti në bregun turistik të Kavajës, por të vetmet probleme që kishim ishin lejet në rërë”, shtoi Rama.
Këto të fundit, sipas tij, ishin dhënë në kundërshtim me çdo ligj, interes publik dhe sens të së bukurës dhe së ardhmes.
“E vetmja gjë që mbaj mend në ato vite kur ata e rimorën Kavajën ishte se si përsëri bashkia e Kavajës u vu në dispozicion të një grupi që funksionon tamam si një bandë grabitqarësh kudo dhe kurdoherë atyre u besohet pushtet”, nënvizoi ai.
Nga ana tjetër, mazhoranca qeverisëse zbuloi të martën e 11 prillit fushatën e saj “minimaliste” elektorale.
Lideri socialist së bashku me 61 kandidatët për bashkitë mbollën plot 61 pemë në parkun e Sheshit Skënderbej.
Kjo, pasi Partia Socialiste nuk do ta zhvillojë të plotë fushatën elektorale, por në vend të saj, gjysmën e fondeve, do t’i investojë për mbjellje pemësh.
Komisioneri Shtetëror i Zgjedhjeve, Ilirjan Celibashi, shpërndau më herët zyrtarisht fondet, përmes të cilave do të organizojnë fushatën elektorale partitë politike.
Nga fondi total prej 345 milionë e 600 mijë lekësh, ose 3.4 milionë dollarësh e konvertuar, 151 milionë e 494 mijë lekë (rreth 1.5 milionë dollarë), shkojnë për Socialistët.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com