Partia Demokratike ka depozituar zyrtarisht tre amendamentet kushtetuese në Kuvendin e Shqipërisë.
Lajmi është bërë i ditur nga kryedemokrati Lulzim Basha.
Nga një konferencë për mediat, ai ka shpjeguar rëndësinë e këtyre amendamenteve.
Sipas tij, ato janë të domosdoshme për ta nxjerrë Shqipërinë nga kriza politike.
“Ashtu siç ju kam informuar, këto tri çështje kryesore në amendamentet tona kanë të bëjnë me reformën zgjedhore, përfshirë të gjitha aspektet e saj, edhe patronazhistët, të cilët i pret belaja, bashkë me kreun e tyre”, tha Basha.
Reforma territoriale
Kryedemokrati ka propozuar ndryshime në reformën territoriale. Ai e ka cilësuar atë si “një dështim” dhe ka sqaruar detaje nga propozimi i PD-së.
“Ndryshimet e vitit 2014, të bëra për llogari elektorale, rezultuan një dështim, kostot e të cilit i paguajnë qytetarët”, u shpreh Basha.
Ai ka propozuar që të ketë bashki urbane dhe rurale.
Reforma Territoriale u miratua në vitin 2014, me 81 vota pro dhe 1 kundër.
Në atë seancë plenare, opozita mungoi.
Kjo ndarje administrativo-territoriale e Republikës së Shqipërisë është organizuar me 12 qarqe dhe 61 bashki.
Ajo në nivel qarku mbeti e pandryshuar, 12 qarqe, ndërsa rrethi si njësi territoriale dhe nëndarje e qarkut suprimohet në kushtet kur numri i bashkive është zvogëluar në 61 të tilla.
Ndarja me 61 bashki bazohet në metodologjinë e zonave funksionale.
Vetting-u i politikanëve
Propozimi i tretë ka të bëjë me vetting-un e politikanëve.
“Koncepti i 2018-ës për ta pastruar Kuvendin nga politikanë që lidhen me krimin, është objektiv edhe sot, por ka një ndryshim themelor”, tha Basha.
Një pikë tjetër e shtuar në Kushtetutë, sipas amendamentit, është ajo për pastërtinë e figurës nga ana e krimit.
“Funksionarët publikë plotësojnë dhe i dorëzojnë SPAK-ut një deklaratë të detajuar për figurën e tyre që mbulon një periudhë 10 vjet përpara deri më datën e deklarimit, sipas ligjit”.
Sondazhi i PD-së
Në konferencë nuk kishte si të mungonte as pyetja nëse Basha do të jepte dorëheqjen për të mos përçarë Partinë Demokratike.
“Nga sondazhet e mia, 95% e demokratëve duan të udhëheq betejën ndaj Rama-Doshi-Rakipi, e të udhëheq betejën për të dalë nga llumi i trazicionit” këmbënguli ai.
Basha ka theksuar se, ka dalë më shumë se çdo kryetar i Partisë Demokratike këto 30 vite në takime me anëtarët.
“Por unë nuk jam nga ata që shfrytëzojnë momente të tilla për të bërë garë se kush e ka autokolonën më të gjatë dhe kush mbush sallat më shumë”, ironizoi ai kështu ish-kryeministrin, Sali Berisha, i cili po zhvillon takime në foltoren e tij.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
