Shqipëria

PD: 3 mijë lekë në muaj për çdo bebe, gjatë 5 viteve


Drejtuesi i fushatës elektorale të Partisë Demokratike shqiptare (PD), Alfred Rrushaj, ka prezantuar të enjten programin ekonomik për buxhetin e familjeve shqiptare. Me këtë program, demokratët do të kandidojnë në zgjedhjet parlamentare të 25 prillit.

PD zotërohet të japë 3 mijë lekë në muaj për çdo fëmijë të lindur, për 5 vite, ku pritet të përfitojnë rreth 30 mijë familje.

Sipas Rrushajt, PD-ja do të financojë 100% të interesave të kredive, për të rinjtë që duan të blejnë shtëpitë e tyre. Nga kjo skemë pritet të përfitojnë 20 mijë familje të reja.

Në sektorin e arsimit, demokratët premtojnë mbështetje financiare për 90% të studenteve për tarifat e arsimit dhe rritjen me 60% të pagës së arsimtarëve. Rrushaj shprehet se ky plan do të prekë familjet e 36 mijë arsimtarëve.

Demokratët shprehen te gatshëm të ulin çmimin e energjisë për konsumin deri në 300 Kilowatt për orë (kW-h). Ata shprehen se kjo masë do të lehtësojë ndjeshëm shpenzimet e së paku 710 mijë familjeve.

“Të punësuarit me pagë mbi 60 mijë lekë do të përfitojnë thuajse një gjysmë page shtesë nga ulja e tatimeve”, thekson Rrushaj.

PD-ja premton gjithashtu rritjen e pensioneve çdo vit për rreth 650 mijë pensionistë, jo me pak se 5% ne vit. Paga e një mjeku “do të shkojë 1 mijë e 200 euro” dhe paga e infermierëve “do të shkojë në 700 euro”.

/Albanianpost.com


Lajmet kryesore