PBB-ja e Kinës rritet me 5.3% në tremujorin e parë – por entuziazmi është i vakët

Rritja në tremujorin e parë të vitit 2024 ishte më e lartë nga sa pritej në Kinë, duke u rritur në 5.3% krahasuar me të njëjtën periudhë të vitit 2023.

Po ashtu duke u dhënë kredi planifikuesve që kanë vendosur për këtë vit një objektiv “rreth 5%”.

Një rritje prej 5.3% në çdo vend tjetër të botës do të pritej me entuziazëm, ndërsa për Kinën i lë të ndarë ekonomistët.

A janë shfaqur më në fund filizat e një pranvere të re rritjeje? Apo është një agim i rremë?

Të dhënat e publikuara nga Byroja Kombëtare Kineze e Statistikave japin një lexim të dyfishtë.

Prodhimi industrial u rrit me 6.1% në tremujorin e parë krahasuar me një vit më parë, por çmimet e prodhimit ranë 2.7%: shenjë e presionit deflacioniste.

Shitjet me pakicë në mars ishin +3.1%, por janë ulur nga +5.5% në janar dhe shkurt.

Dhe më pas, investimet në sektorin e prodhimit u rritën me 9.9%, por investimet në pasuri të paluajtshme ranë me 9.5%.

Kriza e ndërtimit , e cila për 30 vjet ka përfaqësuar një të pestën e PBB-së së Kinës, duket e pandalshme: ndërtimi i komplekseve të reja të banimit ka rënë me 27% dhe përfundimi i kantiereve të hapura me 20%, sepse ndërtuesit nuk marrin më kredi dhe tregu është i ngopur.

Strehimi është forma kryesore e investimit të klasës së mesme kineze dhe zhvlerësimi i kursimeve të tyre ndihet në konsumin e brendshëm.

Rimëkëmbja e ekonomisë së dytë më të madhe në botë mbetet e pabalancuar.

Presidenti kinez Xi Jinping u kërkoi posaçërisht kinezëve të shpenzojnë për rinovimin e pajisjeve shtëpiake dhe makinave.

Ai nxori nga kapela e frazave të tij të famshme “forcat e reja prodhuese, të cilat duhet ta drejtojnë zhvillimin e Kinës nga prodhimi në teknologjinë e lartë”.

Por për momentin receta duket të jetë e zakonshme: prodhimi i tepërt kinez eksportohet me çmime të ulëta , gjë që e nxjerr jashtë biznesit industrinë perëndimore.

Dëshmia vjen nga të dhënat e eksporteve, të cilat janë rritur në vëllim dhe kanë rënë në vlerë të shprehur në dollarë.

Për të fshirë konkurrencën ndërkombëtare, industritë kineze shesin nën çmim, falë subvencioneve shtetërore. Ndodhi me çelikun, pastaj me panelet diellore, tani kufiri i ri i kësaj strategjie janë makinat elektrike dhe bateritë.

Portet e Evropës Veriore janë bërë parkingje të mëdha për automjetet e zbritura nga Kina.

Marrë nga “Corriere della Sera”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.